Nongpoh: Ha kaba kut ka 2nd HNYF Football Tournament, ka lympung ialehkai kaba la pynlong da ka HNYF 20Mer Circle, ka Pahammawlein 20Mer Football Club, ka la ioh ban rah ia ka namlahduh, hadien ba ka la lah ban pynliem noh pyrshah ia ka Kongripara da 3-0 kol ha ka jingiakhun phainal kaba la long madan ialehkai ka shnong Pahammawlein.
Kiba la donlang ha kaba kut jong katei ka phutbol ka HNYF, ki kynthup naduh u Bah Latiplang Kharkongngor, nongialam barim ka HNYF bad uba dei ruh u CEM ka KHADC, kum u kongsan, nangta u Bah Livingstone Thangkhiew, nongialam barim ka HNYF kum u symbud kongsan, u Bah Sadon K. Blah, General Secretary ka HNYF Sengkmie, u Bah Marcus Marten lem, President ka HNYF ha Ri Bhoi, u Bah Jyan Sylliang Rangbah shnong ka Pahammawlein, ki riew rangbah ka thain lem bad kiwei.
Haba phai sha katei ka jingiakhun, watla ka Pahammawlein 20Mer ka la jop da 3-0, hynrei ha ka jingiakhun la iohi ba ka la dei ka jingiakhun kaba itynnad bad kaba iakhaid bha, khamtam eh da ka jingwan sakhi ki paidbah jong katei ka thain. Kumta ha ka kylla step jong ka jingiakhun dei ka Pahammawlein 20mer, kaba la lah ban lamkhmat ia ka jingiakhun da kaba thep 1-0.
Haba bteng ka kylla miet, ka jingiakhun ka la nangkhluid namar kitei ki kynhun kiba la poi sha ka phainal, ki la iakhun tyngeh na ka bynta ban ioh thep kol bad ruh ban long kum ka kynhun lahduh ha katei ka lympung ialehkai. Kumta katba ka jingiakhun ka la nangiaid shakhmat ki rangialehkai ka Pahammawlein 20Mer Football Club, ki la ioh ia ka kabu ban pynkhih jar haduh arsien bad kaba la pynlong ia ka kynhun ba kan pynliem noh ia ka Kongripara SC da 3-0.
Ka Pahammawlein 20Mer Football Club kum ka lahduh, ka la ioh ban khur ia ka song pisa kaba T. 20 hajar lem bad ka Trophy, katba ka Kongripara SC kaba la shah rem noh ha katei ka jingiakhun, ka la ioh ban khur ia ka song pisa kaba T. 10 hajar lem bad ka Trophy, nalor kata la sam ruh ia ki khusnam shimet, kaba kynthup naduh kiba ioh ia ka nam Best Player, Top Srorer bad Best Goalkeeper.
Phi don ban ong eiei?