Ka Inner Line Permit

Bah Ardent Basaiawmoit

Nga sngewdei ban pynmih ia kane ka jingthoh kum ka jingpynshai lyngkot ia kine ki mat khnang ba u paidbah un ioh jingmut jingpyrkhat kaba long kumne harum:-

1. Ka Inner Line Permit (ILP) – Kane ka dei ka ain kaba thaw da ki phareng mynba ki dang synshar ia ka Ri India naduh u snem 1873. Ka jingthmu jong kane ka ain ka long ban iada kyrpang ia ki paid rewlum jong kane ka dong ka thain shatei lam mihngi. Ka Inner Line Permit(ILP) ka dei kata ka jingbit (permit) ba ki briew kiba nabar jong uta u lain uba lah buh ki dei ban ioh. Kane ka jingbit ba lah buh ba dei ban ioh, ka dei ba lah mang da kata ka ain ba lah tip kum Ka Bengal Eastern Frontier Regulation Act 1873. Katkum kane ka ain la ong ba uno uno u briew lane kano kano ka briew ba kwah rung sha kita ki jaka kiba hap ha ki district bapher bapher hapoh ka Provnce of Assam ki dei ban da ioh jingbit lane kata ka permit ba ki khot ka ILP.

Shuh shuh kane ain kam shah ruh ia ki briew kiba nabar ba kin shim bad pyndonkam ia ka jaka hapoh kita ki district ba kane ka ain ka treikam. Nalor kiwei pat ki district, hapoh kane ka ain la kynthup ruh ia ka Khasi bad Jaintia Hills district.

Kumno ban pyntrei kam ia kane ka ain :- Kane ka ain ka kren bad kdew shai kumno ban pyntreikam ia ka. Ka rukom ban pyntreikam ia kane ka ain kam long satia kaba eh bad kaba jwat haduh katta katta kumba lah pynpaw da ki nongialam jong ngi kiba don ha ka Sorkar na ka por sha ka por. Kane ka ain ka batai kumne,

It shall be lawful for the (state government) to prescribe, and from time to time to alter by notofication in an (official Gazzette) a line to be called “ The Inner Line” in each or any of the aboved named districts. Local extent.

Kaba mut ba ka long shongain ia ka Sorkar Jylla ban pynmih jingthoh bad na ka por sha ka por ban pynkylla da ka jingpynbna ia uta u lain uba ki khot,”Inner line” ha kawei ne ha kino ma kino ki district ba lah kynthup ha kane ka ain. Hynrei ka lynti ba ka Sorkar Meghalaya ka lah shim ka long kaba pher bad kaba kham I kyllain.

1. Ka Citizenship Amendment Act (CAA) – Kane pat ka dei ka jingpynkylla ia ka ain long traishnong ha Ri India kaba la tip kum Ka Citizenship Act 1955. Ha kane ka jingpynkylla la bsuh ha ka section 2, sub – section (I), ka clause kaba (b) kumne:

Ki briew kiba dei ki Hindu, ki Sikh, ki Buddhist, ki Jain, ki Parsi bad ki Khristan kiba rung sha ka Ri India ha lane ha shwa ka 31 tarik u Nohprah 2014 ia kiba ym shym la ithuh bad kaba long be-ain katkum ki kyndon ain jong ka Ri yn nym khein be-ain shuh ia ki lyngba kane ka jingpynkylla thymmai ia ka ain long traishnong jong ka Ri India.

Shuh shuh katkum ka paragraph 3(4) jong kane ka Citizenship Amendment Act 2019, la ong ba ki jaka kiba hap hapoh ki tribal areas ha ka jylla Assam, Meghalaya, Mizoram bad Tripura kin lait na ka jingtreikam jong kane ka ain. Kaba mut ba kane ka ain kan treikam beit ha kita ki normal areas kiba kynthup ia ka Police Bazar, ka Jailroad, ka Keating Road, European Ward, ki Cantonment, Municipality of Shillong,( except much of the area comprised within the munciality of Shillong as formed part of Khasi State of Myliem) lait noh kito ki jaka hapoh ka Shillong Municipal kiba dei ki bynta jong ka Hima Mylliem.

Tang ba ki paidbah kin tip ba haduh u snem 2013 ka lah don ka report ba ki Hindu kiba lah phet na Bangladesh ki lah poi haduh kumba 113 lak eiei kaba mut kumba 11.3 million katba Ka jingdon paid jong ngi ki khasi kum ka jaidbynriew baroh ka long tang kumba 15 lak eiei lane 1.5 million . Napdeng kitei ki 11.3 million katno ki lah rung sha kane ka jylla jong ngi ym pat don ba lah ban ai jingkhein wat ka Sorkar ruh kam pat don ia ka jingbuh jingkhein ia kane. Lada kane kam dei ka jingma kaei pat kan dei ka jingma ia ngi?

1. Ka Sixth Scheduled – Da ka jingiasaid kaba jur la lah ban pynkohnguh ia ka Constituent Assembly ban kynthup ia kane ka Khyrnit ha ka Riti Synshar jong ka Ri India. Kane ka kyndon ain ka dei kaba mang ban ai bor ia kita ki autonomous district ba kin synshar da lade lyngba kita ki District Council lane Regional Council.

Shuh shuh la ong ba ki ain jong ka Sorkar Jylla ne ka Sorkar kmie kin nym lah ban shu trei kumto, Application of Union and State Laws – No act of the Legislature of the State in respect of which the District or the Regional Councils have power to make law shall apply unless the District Council by public notification directs and the District Council can in so applying the law make any exceptions or modifications it thinks fit. In respect of any other law made by Parliament or the Legislature of the State, the Governor shall determine whether it shall or shall not apply to the autonomous district or regions and, if so, the Governor may make such exceptions or modifications as he may notify with or without retrospective effect.

Ha kaba ia dei bad ka Meghalaya, ha kane ka Schedule, Meghalaya ka mut, ka autonomous State ba lah thaw lyngba ka Article 244 – A bad ka kyntien autonomous pat ka thew ia kata ka hok ban synshar da lade ia lade ne ka right of self- government.

Ha kane ka kyndon ain la pynshai ruh ia kita ki jaka kiba hap hapoh ka Khyrnit jong kane ka Sixth Schedule kaba ki ong ka Table ha ka para kaba 20 bad lah pynbeit thymmai ruh na ka A and B sha ka part I,II, IIA and III. Hangne ka kdew shai ba ka Sixth Schedule ka treikam beit tang hapoh kita ki tribal area ba la kdew ha ka Table II jong ka para 20. Kaba mut tang ha ka Khasi Hills District, Jaintia Hills District bad Garo Hills District.

Na kitei ngi sngewthuh shai ba ka Sixth Schedule ka dei kaba la bhah na ka bynta ki autonomous district ym ia ki Jylla ba pura lane ki full fledged State. Dei namar kata ka daw la bsuh ia ka Para 12A hapoh ka Sixth Schedule ban pyntikna ba kan nym don ar tylli ki bor synshar hapoh ka Jylla Meghalaya namar ka Meghalaya kam dei shuh ka autonomous State hynrei lah dep ban kyntiew ia ka sha ka Jylla ba pura ha ks 21 tatk u Kyllalyngkot 1972 lynhba ka North Eastern Areas(ReOrganisation) Act, 1971.

Kumta ngi dei ban sngewthuh shai ba hadien ba lah pynkha ia ka Jylla Meghalaya la weng ruh ia ka jingphiah hapdeng kita ki tribal area bad ki normal area bad ka Jylla Meghalaya ka long pura ia baroh kawei. Namarkata ban ong ba ka Citizenship Amendment Act 2019 kan nym treikam ha ki tribal area ka long kumba pynhiar kyrdan biang ia ka Jylla Meghalaya sha ka autonomous State. Ngam sngewphylla ia kane ka jingleh jong ka Seng BJP namar ngi lah iohi kaei kaba lah jia ia ka Jylla Jammu Kashmir kaba lah shu shah pynkylla Union Territory kha ma kha.

Kaba kham sngewthamula ka long ba ki nongialam jong ngi kiba don ha ka Sorkar ki lah pyrshang katba lah ban pyni jingeh ha kaba iadei bad ka jingpynrekam ia ka ILP kaba long ka lad jingiada ia ngi bad ki la pyrshang ruh ban pynshngain pat ia u paidbah ha kaba iadei bad ka CAA da kaba pynpaw ba kane ka ain kan nym treikam ha ki tribal area.

Kan long kaba jrong eh lada ngan thoh bniah ia kane, hynrei tang ban lam jingmut ia ki paidbah halor kitei ki mat kiba kongsan eh khamtam ha kine ki por kiba mynta nga la pyrshang katba lah ban thoh lyngkot ia kane ka jingthoh jong nga.

Kaba khatduh ka jingkyrpad jong nga ia ki paidbah nongpule ba kin sngewbha ban pule da kaba pyrkhat jylliew bha.