Bthei u bom ki suba GNLA, iap 2 ki pulit Khasi, mynsaw uwei

Shillong,25Naitung:
Kumba ju long manla ka sngi ki pulit , mynta ka sngi ki pulit ka West Garo hills ki la leit ban iaid pahara da ka Gypsy jong ki ha ka surok na Rong ram sha Dadengre, hynrei mynta ka sngi kynsan kynsan katba ki dang don ha lynti uwei u bobm ba la pynap da ki suba lehnoh GNLA u la bthei katba ki dang poi ha Tebronggre, kaba don hajan Rongram kaba jngai kumba 18 kilomitar na Tura.
Ha katei ka jingjia ar ngut ki pulit langrut ki la iap , bad baroh ar ngut kitei ki pulit ki dei ki Khasi, uwei u dei uba la tip kyrteng kum u Arphuis Khymdeit katba uwei pat u dei u nongniah uba la tip kyrteng kum u Lambarthu Suchiang, uwei u la iap hashen katba u wei pat u la iap ha Civil Hos pital,Tura.
Katei ka jingjia ka la jia ha ka por 5 baje janmiet ha kaba u wei u bom IED u la bthei kynsan ha katei ka jaka. Ki pulit ki la suba jur ba katei ka jingjia ka dei ka kam pyntriem jong ka seng lehnoh ka GNLA, uwei pat uba la mynsaw u dei uba la tip kyrteng kum u Rahul Marak, la pynkit noh ia mar-mar sha Guwahati ban shah sumar.
U SP ka West Garo Hills u la ong ba ha ka por ba katei ka jingjia ka la jia, ki la don 5 ngut ki pulit kiba la shong ha kawei ka Gypsy kaba iaid pahara , u la ong ba ki pulit hadien ba la ioh jingtip ki la hiar jurip sha katei ka jaka , bad haduh mynta ki dang ap ia ka ripod kaba bniah halor katei ka jingjia.
Na ka liang ka sorkar jylla ka la phah ka jingsngewlem sha ki bahaing ha sem jong kitei ki pulit kiba khlad noh bad na ka liang ka sorkar jylla ka la kular ban pynrben ia ki bor pahara ha kite ki thain ban ioh kem ia ki ba la donkti ha katei ka jingjia.