Pynrem ka KHNAM, HYC, MEPA ba shah thombor ki pulit, nongthohkhubor

Shillong,25 Naitung:
Ka Khun Hynniew trep National Awakening Movement (KHNAM), ka la pynrem jur ia ka jing shah thombor ki Enforcement jong ka KHADC bad ki nongthoh Kotkhubor ha ki nong khaii bar jylla ha ka por ba ki dang pyndep ia la ka kamram ba la bynshet ha ki kaba la jia mynta ka sngi thohdieng ka 25 tarik u naitung. Ka KHNAM ka dawa ban kem mardor bad ban pynshitom tyngeh ia ki briew kiba don kti ha katei ka jing thombor.
Ha kajuh ka por ka KHNAM ka ai ia ka jing kyrshan jong ka ia ka KHADC halor ka jingthmu jong ka ban pyndep hok ia ka kamram katkum ba la ai bor da ka riti synshar jong ka Ri lyngba ka 6th Scheduled. “Ngi ai mynsiem ruh ia ka EC baroh kawei bad khamtam ia u Executive Member jong ka Trade u Bah Latiplang Kharkongor kiba la pyndep hok ia la ka kamram. Ngi pynshlur ruh ia ki Enforcement ba kim dei ban tieng ne riej haba ki pyndep ia ka kamram naka bynta ka Ri bad ka Jaid bynriew” ong ka kyrwoh na u General Secretary ka KHNAM u bah Batkupar Wahlang.
Ka KHNAM lyngba ka kyrwoh ka maham ruh ia ki trai jylla bad ki bar jylla kiba pynkhein ia ka Ain jong ka 6th Scheduled bad khamtam ba ki bar jylla kin husiar bad kiar na ki kam be-ain jong ki. “Nangne shakhmat ,lada ka seng ka lap ia ki riew pynkhein Ain kan leh da ka ba tyngeh.”, pynkut ka kyrwoh.
Ka Hynniewtrep Youth Council , HYC ka seng kaba dang shu thaw thymmai dang shen lyngba u samla Donbok Kharlyngdoh, Convener ka la pynrem jur ia katei ka jingleh donbor ki bar jylla khamtam ia ki briew ka ain kiba don hapoh ka Uniform, na ka liang ka HYC ka la ai mynsiem ia ki bad kyntu ia ka KHADC kaba la ialam da u bah Ardent Basaiawmoit kum u CEM ba kan ym kynran dien hynrei ban tur shakhmat ban trei na ka bynta ka iap ka im ka Jaitbynriew.
Ka Meghalaya Editors & Publishers Assoaciation (MEPA) ka la pynpaw ia ka jingkyndit kaba khraw halor ka jingshah ktah kti iki nongthoh khubor, kynthup ia iwei i nongthohkhubor ba dei i longkmie, katba ki dang pyndep ia la ka jong ka kamram ban lum khubor ha ka por ba ka KHADC ka dang ialeh ban weng ia ki nongdie jingdie kiba shong be-aiñ ha Motphran bad ki shilynter ki surok ha Iewduh. “Ka jingktahkti ia ki nongthoh khubor da kita ki nongshong die jingdie beaiñ ka long ka kam khawpud kaba ngi pynrem mardor bad ngim lah ban pdiang da lei lei ruh” ong u General Secretary ka MEPA u bah Philip Marwein. Ka MEPA ka dawa na ki bor ba dei peit ba ki dei ban leh tyngeh ia kitei ki nongleh donbor bad dei ban pynshitom tyngeh ia ki katkum ki kyndon jong ka aiñ.