Shillong: U Erwin K. Syiem Sutnga u ba dei ruh u President ka MLPU haba kren bad u Rupang u la ong ba ka Union kam hun satia ia ka jing pynshai u symbud myntri rangbah ka jylla u Prestone Tynsong halor ka jing thung ka sorkar da u M. S Rao kum u Chief Secretary ba thymmai ka jylla haka jaka u Hector Marwein.
“Ka jing kren u Prestone Tynsong ka long kumba kren kai ki khunlung khynnah namar kam donka jing pynshai halor ka jing thung ka sorkar Meghalaya da u M. S Rao haka jaka u Hector Marwein kum u Chief Secretary ba thymmai ka jylla”.
Kumba shu pynkynmaw u Prestone Tynsong ha ka 13 tarik kyllalyngkot u la ong ba ka jing thung Chief Secretary hapoh ka jylla ka shong ha ka jing stad ka sorkar bad ka sorkar kan ym lah ban pynkhein ia ki kyndon thung Chief Secretary kiba la btah ha ka ‘Service rule’ jong ka sorkar India ne sorkar ka jylla.
Dang shen ka MLPU ka la phah ia ki jing kylli sha u symbud myntri rangbah ka jylla u Prestone Tynsong halor ka nogrim ba kumno ka sorkar ka thung ia u M. S Rao kum u Chief Secretary watla u dang dei u ba dang khynnah ne ‘junior’ ia u Hector Marwein.
U Erwin K. Syiem Sutnga u la ong ruh ba u Prestone Tynsong u khlem pat pynshai ia ki jing kylli ba ka Union ka phah sha u lyngba ka shithi. U la ong ruh ba u Prestone Tynsong u khlem pat jubab ia bun ki jing kylli kiba kynthup, hato ka sorkar Meghalaya ka la phah kyrwoh ne em sha u Hector Marwein halor ka jing duh jong u ban long Chief Secretary ka jylla? hato la don ne em ka jing kylla ia ka Indian Administrative Service Regulations 1955 bad ia ka the Indian Administrative Service Rules1954 ha shwa ban pynmih ia ka hukum ban thung Chief Secretary hapoh ka jylla.
Phi don ban ong eiei?