Maham ka CoRP ia kiba pynsngewthuh bakla halor ka ILP

Shillong: Ka Confederation of Ri Bhoi People (CoRP) hapoh ka lama jong ka CoMSO ka la maham tyngeh ia ki riew shim kabu kiba pynsngew thuh bakla ia ki paidbah halor ka jingdawa pyntreikam ia ka Inner Line Permit (ILP) hapoh ka Jylla.

Ka seng ka maham jur ia ki bar jylla, ki ophisar bar jylla bad ki nongkhaii kiba pyntieng bad pynsyier ba lada pyntreikam ia ka ILP kan ktah ia ka jylla bad kan hiar ka kamai kajih, bad ki tourist kin wan kai shuh sha Meghalaya ka dei ka jingthmu ban ialam bakla ia ki paidbah nongshong shnong jong ka jylla, “kim dei ban sngewthuh bakla kane ka dei tang ka jing pyntieng koh tympan ki riew shim kabu”.
Kumta seng ka kwah ban pynshai paidbah ba kim dei ban sngewthuh bakla halor ka jingdawa ILP bad lada don kino kino ki bym sngewthuh ia ka ILP kin sngewbha ban iakynduh ia ki nongialam jong ka CoMSO ngin pynshai ha ki lane lada don kiba kwah ban ia tainia ruh ki nongialam ka CoMSO ki kloi ba iatai nia na bynta ban iashai baroh.
Na ka liang ka CoRP ka kyntu ia ki Rangbah Shnong ki Dorbar Shnong, ki riew paidbah ba kin long kiba peitngor ha ki shnong ki thaw ki jong ki bas kim dei ban ai lad ia u bar jylla ban wan shong wan sah ha ki shnong ki thaw jong ki, ka seng ka maham jur bad kan ym shah iano iano ban wan batai stad ia ka iap ka im jong ka jaidbynriew ka Bri u Hynniewtrep.