Ka khubor ban mih na ka NPP, ka long ban pyn ia shrut ia nga bad U MR

Ka jingmih khubor ban mih na ka NPP ka long ban pyniashrut ia nga bad u Myntri rangbah la ong u Martin M Danggo speaker ba rim jong ka iing dorbar thawain ka jylla, kum ba la paw ha ki lad pathai khubor bad kumjuh ha ki social media.

Ngam don jingtip eiei ruh em ia kata kaba la mih ha ki lad pathai khubor ne ki social media, nga don sha shnong ha kine ki sngi bad kam shym la don kata ka jingiakren ruh ban mih naka party NPP.

Kumba la paw ha ki lad pathai khubor bad ki social media bala kynnoh ba u myntri rangbah ka jylla u Conrad K Sangma ba u leh bein ia nga, halor kane ka jingkynnoh na ka liang jong u mytnri rangbah ka jylla kam don eiei kum kata ka jingleh bein ia nga.

Ha ka jingshisha nga sngewnguh ia u myntri rangbah ka Jylla ia ka jingai ia ka Ranikor Civil Sub Division bad u la thung ia nga kum u Co-Chairman jong ka State Planning Board, ha ka kyrdan kabinet minister.

Na ka liang jong nga, nga shim ba kane ka dei tang ka buit jong no re jong no ban wanrah ia ka jingiapher jingmut ne ban wanrah ia ka jingsngewthuh bakla ha pdeng u myntri rangbah bad nga. Haduh mynta kam don kano kano ka jingiapher jingmut hapdeng jong nga bad u myntri rangbah bad kumjuh bad ka party NPP.

Lada don kano kano ka jingkylla ha dien ha but ruh, ngan nymleh lyndet khlem da kren ia u National President jong ka party u ba dei u myntri rangbah ka jylla Meghalaya bad ia u State President bad ia ki nongialam ba ha khmat duh jong ka party bad lada nga leh ruh ngan resign shuwa na ka kam ba nga bat mynta kum u Co-Chairman State Planning Board bad naka party.

Halor ka jingpaw ha ki lad pathai khubor ba ngan ialeh ia ka kam MDC kane ka long ka bym don nongrim haei haei ruh, haba ia dei bad ka MDC ilekshon ngan ai ka jingkyrshan ia uno uno u kyrtong ba ioh ia ka tiket jong ka party NPP.

Ka jingmih ha ki lad pathaikhubor ba ngan mih naka party NPP ka long ka bym shisha bad ka bym don nongrim haei haei ruh, hooid naka liang jong ka seng Congress ki juh khot biang ia nga, hynrei ngam shym la pdiang ia ka jingtyrwa ia mynta.

Bah Martin M Danggo

Ex- MLA Ranikor Constituency