U billionaire na Japan, u tyrwa ban pynlut haduh £7million ka pisa jongu bad ban siew ia katei, da kaba jied lymmuh ia kito kiba don ha ka thup jongu ha ka twitter.
U heh spah, uba die jain, U Yusaku Maezawa, u shim ia katei ka lad ban pynlut ia katei ka pisa, ban pynthikna halade, la ka jingai pisa ia ki briew, ka iarap ne em ban pynsuk mynsiem ia ki.
U Maezawa, 44, un ai £7,000 ka pisa na ka bynta shi hajar ngut kiba don ha ka thup jongu lane ki follower bad na kitei un jied naphang bad kin dei kito kiba jubab ia ki jingthoh jongu, lane kiba la retweet, na ka jingthoh kaba ula thoh ha ka 1tarik Kyllalyngkot 2020.
“Ka dei ka jing pyrshang kaba bha shibun” ong U Maezawa ha ka YouTube, ha kaba u khmih lynti ba katei ka jingleh jongu, kan ai jingmut ia kiwei de ki academics bad ki economists.
U Maezawa, un leit jingleit sha u bnai ha u snem 2023, ha kaba un leit da ka liengsuin ba kyrpang ka Elon Musk’s SpaceX bad u dei uwei na ki briew kiba bang bha ban pynlut ia ka spah jongu.
U Maezawa, u dang pyrshang mynta ban pyniaid ia ka jingmut jongu, na ka bynta ban pynlong ia ka jingim ha ka pyrthei, kaba trei kam khlem pisa. U dang pyniaid ruh ia ka mat iakren, na ka bynta ban ai ia ka jingsiew kaba iahap kyrdan ia ki nongshong shnong lane kumjuh ia kito kiba kham paw pyrthei ha ka sain hima sima.
U Maezawa u don ka spah kaba £2.4billion, ha kaba u dei uwei na ki 18ngut kiba riew spah tam ha Japan.
Phi don ban ong eiei?