Ka jingai ai laisen ki EC barim, ka long thurmur

Shillong, 24 Naitung:
Ka jingai laisen bylla, ia ki bym dei khasi da ki EC barim kam long kaba shai bad ka long kaba thurmur bha.
Katkum ka jingia kren bad u Executive Member (EM) ba peit ia katei ka tnad Labour u Bah James Ban Basaiawmoit u la ong ba katkum ka jing tip jong u ba ka EC barim ki ai labour license tang da kaba thoh ha ka rusit (receipt). Katkum ka jingong jong u EM kane ka rukom ai kam long kaba shai bad ka rukom pyniaid ka bym biang.
“Mynta ngi la pynkylla ia ka rukom pyniaid da kaba shai ha kaba yn buh jingkhein thik pa thik”, la ong u Bah Basaiawmoit.
U EM u la ong ruh ban pynlong ia ka jingtreikam jong kane ka tnad kaba shai, ka jingshon ia ki phom ruh la buh jingkhein bad ka jingdon kiba wan shim phom bad kiba wan submit.
“Da kaba shu pyndonkam da ka rusit, kam long kaba khuid bad kaba shai”, la ong u Bah Basaiawmoit.
Khnang ban pynbha ia ka jingtreikam, u EM u la ong ba la pynkhreh mynta ban siew ruh da ka challan ha ki bank khnang ban lait na kano kano ka jingleh bakla bad ka jingthurmur. Kane ka jingleh ka long shi bynta ban kynshew pisa na ka bynta ka Council watla ka long kaba rit ruh.
Katkum ka jingong u EM, ki nongtrei bylla bym dei Khasi naduh kiba niah kali, trei karkhana, shong iing ruh, ki donkam ban aplai ia ka labour license.
Kito ki bym don ia ka Labour license ki hap ban leit shim bad lada kim don ne kim leh ia ka license lada lap ka Council kan pynshitom ia ki.