Lah ban don kti ki trai Jylla, ban ialam hiar thma ia ki khar Bangladesh

Shillong: Ki shipai Border Security Force (BSF), ki kynnoh ba ki lah ban donkti lang ki briew ka jylla ban iarap ia ki khar Bangladeshi ban hiar thma ia ki shnong khasi ha ka thain West Jaintia Hills.

Kumba shu pynkynmaw ha ka 4 tarik kyllalyngkot 2020 kumba 12-14 ngut ki khar Bangladeshi ki la hiar thma ia ki paidbah khasi ha ka shnong lad darang bad ki la rahbor bad pynmynsaw ia ar ngut ki briew. Kine ki juh ha ka step phyrngap jong ka 8 tarik Kylla lyngkot 2020 ki la hiar thma sa ia ka shnong Amdoh bad ki la pyn mynsaw ia argut ki shipai BSF bad ia uwei u riew paidbah.
Kat kum ki khubor na ka liang jong ka BSF ki la ong ba ka BSF ka suba jur ba lah ban donkti lang ki trai shnong khasi ban iarap lem ia ki khar Bangladeshi ban wan kiew sha poh u pud u sam ka jylla.
“Ngi suba jur ba ki khar Bangladesh ki ioh jing iarap na ki khasi namar kumno kin shu tip lano bad haei kin hiar thma ne lute ia ki trai shnong ha ka thain” la kynnoh u nong ai khubor ka BSF.
U la ong ruh ba lada ki khar Bangladeshi kim ioh jing iarap na ki trai shnong kin nym nud satia ban wan da ki phew ngut sha ki shnong khasi ban hiar thma ia ki paidbah ne ia ki shipai BSF.
Ka BSF hadien ka jing jia ha ka 8 tarik kyllalyngkot 2020 ka la nang pynkhlain ia ki shipai bad ka la pynlong ruh ia ka jing iaid pahara man ka meit khamtam ha ki thain Dawki, Bakur hapoh ka West Jaintia bad kumjuh ha East Khasi Hills.
Na ka liang ka BSF ka la thoh ruh sha ka Border Guards Bangladesh (BGB) jong ka ri Bangladesh ban pynshai ia ki halor ka jing wan hiar thma ki briew na ka ri Bangladesh ia ki shnong India. Ka BSF ka la dawa ruh ia ka BGB ba dei ban kem mardor ia ki briew ka Bangladesh ki ban wan rung tuh bad ban hiar thma ia ki briew ha ka jylla.
Haba kylli shaphang ka jing kynnoh ba ka jing wan hiar thma ki khar Bangladesh dei namar ka jing tlot ka BSF, u nong ai ktien ka BSF u la ong ba ki paidbah kim dei ban kynnoh tang ia ka BSF namar bun ki khappud kim don satia ia ka jing ker sainar ba pura bad kane ka pynsuk bha ia ki khar Bangladeshi ban wan kiew sha ka jylla Meghalaya.
Na ka liang ka BSF ka la thoh sha ka sorkar kmie ka ri India ba dei ban phah shipai shuh sha ki khappud ka jylla khamtam ha ki thain West Jaintia bad East Jaintia Hills.