Ka jinghiar dor ka akor longbriew manbriew

Arban P M Tynsong, Mawkajem

U briew udei u jingthaw ba kyrpang tam jong u Blei,katkum ka jinghikai Khristan u briew udei ka dur jong u Blei hi.U briew udei ka temple jong u Mynsiem Bakhuid,ka jinghikai Khristan ka ong shuh ia u briew la thaw na ka shikham ka khyndew bad u Blei U la pyrsad Mynsiem na lade hi bad u Blei U la pynkyntang ruh ia u briew kum u kynrad jong ki jingthaw baroh.

Baroh ki jaidbynriew ha shityllup jong ka pyrthei ki kubur ba u briew udei u jingthaw uba stad tam napdeng ki para jingthaw baroh.U briew u don iaka bor sngewthuh,u don iaka pyrkhat briew,u don iaki jingstad kiba u Nongthaw U la bsiap lypa.U briew u ngam sha ki hira bad u tih sha ki jing jylliew jong ka pyrthei bad u sa jer kyrteng ia baroh kiei kiei kiba don ha suiñ,ha duriaw bad ha ram-ew.U briew u lah ban pyniapher ia kawei ka jingthaw na kawei pat,u tip ruh ia kaba bha bad kaba sniew,u tieng iaka sang bad u kamai iaka hok.

U briew u don la ka longing longsem,u im ha ki kynhun kynhun,u don laka shnong ka thaw,u don la ka it ka hima,u don laka dong ka thaiñ,u don ruh laka jong ka Ri ka muluk.U briew u phiah kumne khnang ban suk ka rukom pyniaid iaki jingsynshar ing,synshar shnong lane synshar hima sima.Nangta shuh shuh u briew u don laka jong ka jong ka kynhun jaidbynriew kaba iapher ki riti dustur kawei na kawei pat,u don ruh ia ka niam ka rukom kaba iapher ki jinghikai kawei ia kawei pat.
Nalor kitei kiei kiei baroh u briew u don ruh iaki jingnang jingstad,ki jingshemphang,hynrei kam biang pat iangi lada ngim don iaka “AKOR”.
Ka akor kadei ka burom jong ngi ki briew,ka don ia ka hor ban kyntiew khet ia ngi,iaka ing ka sem jong ngi,iaka Ri bad iaka ka jaidbynriew hi baroh kawei.Ka akor kadei ka jingaiei kaba kordor tam kaba la ai da u Nongthaw ha ngi u bynriew,lyngba ki jingdon iaka akor ngi tip iaka sang iaka ma bad iaka dei iaka lait.Ngi ioh iaka akor na ki Rympei kiba long ka kop ksiar ka kop rupa lyngba ki kmie ki kpa,ki bahalor,ki nonghikai,ki paralok,bad kino kino kiba ai jingmut ia kaba bha kamut kita ki pyn-i iaka akor.Ngin pdiang ia kiei kiei kiba bha,wat lada ki briew kiba sniew sa katno katno ruh hynrei lada ki kren ia kaba bha ngi hap ban pdiang iaki namar kiei kiei kiba bha ki wan na u Blei.
Ngi im ha kane ka pyrthei ngi dap tang da ka lait ka let suda, hynrei ngi donkam ia ka jingiapyn-i lem bad ka jingiasneng markylliang.Ban kyrtiang dien sha ka mynnor ngi don iaka LYNGWIAR DPEI bad ka PALONG (Jingthiah), kine kidei kita ki shlem jingstad hapdeng ka jaidbynriew Khasi jong ngi hyndai.Kine ki shlem ki ai jingnang jingstad haka liang ka burom ka akor.Ki kmie ki kpa,ki kñi ki kong,ki meinah ki meisan,ki mei-ieid ki pa-ieid,ki kur ki kha,hapdeh ka lyngwiar dpei ki lum iala ki khun ki kti ki ioh ka kabu ksiar ban ia phylliew jingmut bad ban sneng ban kraw iaki.Ki ai ia ki jinghikai kumno ban iaid ban ïeng,kumno ban kren kren ban khana,kumno ban riam ban kup,kumno ban bam ban dih,kumno ban khieñ kur khieñ kha,kumno ban ithuh hynmen para,kumno ban burom iaki bakha ki pyrsa bad kumno ban leh tang ia kiei kiei kiba bha.Hynrei ka por ka kylla pyrdet bad sa shisien biang ka diengïei kala kah dum ngit iaka pyrthei u khun Khasi.Ka akor Khasi kala Shah bam hynroh,u khla u thlen ula ioh jaka ha manla ki dong ki kyntoit ba shong u bynriew.U myllung bad u khrawpyrkhat ka Ri Khasi u Radhon Sing Berry u kren bynñiaw kumne:

A!ko akor Khasi,
Hngno pha don mynta sha;
Ha dohnud ki khun ka Ri,
Ne ymdon ba pdiang iapha.

Ka Ri Khasi kaba la ju tip mynnor kum ka Ri jong ka burom ka akor,ka Ri kaba tuid tang da ka dud ka ngap,hynrei shaei noh ki jah mynta?kin sah satang ki jingkynmaw kum ki dak ha u maw bad kan sa poi ka por ba ki pateng ban wan kin shu pynlong iaki tang kum ki puriskam shuthaw.
Mar synkhie hi naba thiah ngi la iohi iala ka ing ka sem,iaka pyrthei sawdong sawkun bad iaki jingkylla pyrdet jongka.Kumno ki kmie ki kpa ki im ki long,kumno ki khun samla ki iaid ki ïeng,ka nuksa kaba kumno ki hep barit kin bud………….? Mynno bad mano bala pynlong ia ki khun ka Ri jong ngi haduh katne? Mano ban kit khlieh? Ki sengbhalang! ka sorkar! ne ki kynhun niam! lada ymdei hi ki kmie kpa??Shuwa ba ka sngi kan sep,shuwa ba u bnai un ngen pyrthei iangi kan ai jingtngen.Ki kmie ki kpa kin hap ban kit khlieh halor ka jingjot ki khun jongki.Kumba ngi iohi hi mynta ki kmie ki kpa kim ju don por wat tang khyndiat ruh ban ia shongkai,ban khroh bad ban sneng iala ki khun,ka Mobile Phone,ka Television,ka jingshang rkai ingbriew than bad ka jinglorni kala teh mraw iaki.Don pat kiba Shu lapmiet ban kren tang da ki kyntien kiba Khor iala ki khun la kumba kyrhuh u lar-en,don pat ki kmie ki kpa namar ba ki ieid eh iala ki khun ki shu pynhun beit ia manla kiei kiba ki khun ki kwah khlem da thew da woh bha iaki tarajur namar ki ong ba kiwei ki leh nga ruh ngan leh lem.Ki don ruh ki kmie ki kpa kiba shu iohi beit tang ia kiei kiei kiba bha iala ki jong ki khun hynrei ki khaprip pat iaki jingsniew,wat lada ki khun jongki ki sniew sa katno katno ruh kin shu Ong beit,’bym lah sneng shuh,uba tamsneng duh,ne u kylla long kumne namar ba u ia u ialang paralok bad uta uta ne kata kata……….’ bad kumta ter ter hynrei ban da sneng da pyn-i hi te em kim ju don por.Kan myntoi aiu iangi ban ong, ‘kine kidei ki khun jong nga’ haba wat ia lade hi ngim pat sngewthuh iaka kyrdan longkmie longkpa.Ki kmie ki kpa lada ki kwah hi ba ki khun jong ki kin imbha immiat kim ju dei lano lano ruh ban aili than,ban pyndem tdong hakhmat ki khmat ki khun ba kha hi,lada ki kmie ki kpa kim lah ban leh kumta kamut ba kim ieid khun bad ki hikaishaki jingsniew.
Ka kawei kaba kumno kien ki heprit jong ngi kin iohi,bad ka lawei kaba kumno kieñ ki khun samla kin tei iala ka Ri bad ka Jaidbynriew,da ka jingiashongkha khynnah lane shongsang,da ka kyaid,ka khalai,da ki drugs,daka ka jing bymtip kur bymtip kha,ne da kiwei kiwei pat ki jingsniew? Hynrei em,tang da ki jingiatreilang.Ngin iatreilang lyngba ki jingieid,jingiatylli,bad jingiasngewthuh jingmut khlem da thew shilliang khmat bad daka jingsbun.Ki kmie ki kpa bad la ki khun,ki khun samla,ki hep barit bad kiwei kiwei kiba don iaka mynsiem iarap lem ban tei iaka imlang ka sahlang ban iarap ban iasneng ia kyntu,ban ri iaka burom ka akor jong ki khun baieid jong ngi ban sah ka nam pateng pakit naduh mynnor mynta haduh lanor.