Kyntu ka HYC ia u Director ka infilltration ban pyn pyrkhing ia ka jingpahara ha khappud

Shillong: Hadien ki jingjia ka ba la pynsyier ia ka shongsuk shongsain kham tam ha ki jaka ba khappud jong ka ri India bad Bangladesh na ka liang ki Hynniewtrep Youth Council Central Body ki la leit ban kynduh ia u director ka Inflitration u bah O.Pasi.

Ha ba ia kren bad ki lad pathai khubor na ka liang u President ka HYC, u Robertjune Kharjarin, u la iathuh ba ka jingwan kynduh jong ki ka long namar ba ka infilltration kam shem la lah ban trei kam bha ha ka ba ka la wan rah ia ka jing dkoh ha kane ka liang, ban kem ia ki ba wan rung tuh ha ka ri jong ngi ha ka ba ki lawan ban thom bor ia ki nongshong shnong ka jylla.

U la iathuh ruh ba na ka liang u director ka Infilltration u bah O Pasi, u la pynpaw ba ka jingdkoh ban trei kam ka tnad infilltration ka long ba wat la ka dei ka directorate ruh hynrei ka don ka jing duna briew ki ba trei ha ka tnad infilltration ha ka ba ki pulit ki ba dei peit ia ka jylla kin hap trei lang ia ka infilltration kane ka wan rah ia ka jingkhia ha ka kam jong ki bad ka jingdkoh ha kine ki liang.

U la iathuh ruh ba na ka liang ka HYC kin sa leit ban kynduh ruh ia u Myntri ka kam pohing ka jylla u James K Sangma ban dawa ban buh noh da kawei ka tnad pulit infilltration ka ban peit kyrpang tang ia ki bar jylla ki ba wan rung kyrthep ha kane ka jylla jong ngi.

Na ka liang ka HYC ki la kyntu ia u myntri ka kam pohing u James K Sangma ba un shim khia ban pynkhlain ia ka tnad infilltration bad kumjuh ruh ia ka Directorate of infilltration ba kan shim khia ha kane ka liang khang ba kan iada na kano kano ka jingshong syier jong ki nongshong shnong ka jylla.

Ka jingwan rung kyrthep jong ki mynder ri ka dei ka jingdonkti ki BSF:Robertjune

U nongialam ka Hynniewtrep Youth Council Central body u bah Robertjune Kharjahrin u la pynpaw ba ka jingioh wan rung kyrthep jong ki mynder ri ha kane ka Ri jong ngi ka dei na ka jingdonkti jong ki shipai BSF.

Ha ba ia kren bad ki lad pathai khubor u la ong “Ka jingioh wan rung jong ki mynder ri ha ka Ri jong ngi ka dei na ka jingdonkti jong ki Shipai BSF hi namar ki dei ma ki, ki ba dei ban peit bad pahara ia ki ba wan rungtuh sha kane ka Ri jong ngi, hynrei wat lada hapdeng ka jingpahara jong ki,ki mynder ri ki dang ioh ban wan rung sha kane ka Ri jong ngi te ka jingkynnoh kan iaid beit sha ki shipai BSF.”

U la pynpaw ruh ba na ka liang ka HYC kam don shuh ka jingshaniah ha ka rukom pahara jong ki shipai BSF bad u la kyntu ruh ia Sorkar jylla ba kan shim khia bad ban pynkhlain noh ia ka tnad Infilltration khnang ba ka jylla jong ngi kan don ha ka shongsuk shong sain.