Satang kumba 72.8 km ki jaka ba khlem pat ker sainar kiba hap hapoh ka khappud bad ka ri Bangladesh

Shillong: U Inspector General jong ki Border Security Force (BSF) Shillong Frontier u Kuldip Saini mynta ka sngi u la ong ba ka Meghalaya ka don haduh 444 km khappud bad ka ri Bangladesh bad mynta satang 72.8 km ba khlem pat dep ker sainar hapoh ki jaka ki ba hap hapoh West Jiantia Hills bad East Khasi Hills District.

U la ong ba ka daw na ka jing slem ka jing ker sainar ka long ba ka BSF ka shem jing jynjar ban ioh jaka na ki trai jaka ban ker sainar. U Kuldip Saini u la iathuh ruh ba ka BSF ka hap ban ia shong jing ialang biang bad ka BGB namar ki don kumba khathynniew tylli ki jaka ki ba hap ha khappud bha bad ka ri Bangladesh na ka bynta ban ker ksainar shiah na rud jong ki shnong India.

U Inspector General jong ki BSF u Kuldip Saini u la ong ba ki shipai BSF ki long ki ba trei shitom bha ban ia da ia ki khappud wat lada ki dang bun ki jing duna hapdeng ki jing triekam jong ki.

“Ka jing bym don surok ha ki shnong khasi ba hap hapoh ka khappud bad ka Bangladesh ka long kawei ka jing eh ia ki Shipai, bad ka jing bym ai jaka ki trai jaka ka la pynslem shibun ia ki shipai ban sdang ia ka jing ker sainar ha bun ki jaka” u la bynrap.

U Kuldip Saini u la kyntu ia ka sorkar Meghalaya ba ka dei ban pynsngewthuh ia ki paidbah halor ki jaka bad halor ka jing donkam kyrkieh ia ka jing sainar shaih habaroh ki khappud Bangladesh bad India.