Kiba pyrshah ILP, ki dei ban mih noh na ka Jylla Meghalaya:KSU

Shillong: U President ka Khasi Student Union (KSU) u Lambokstar Marngar myn hynnin ka sngi u la ong kino kino kiba pyrshah ia ka jing dawa ka jylla ia ka ILP ki dei ban mih noh syndon na ka jylla Meghalaya.

Ha dien ka jing mih ki khubor lyngba ki ‘social media’ ba don ki ba pyrshah jur ia ka ILP ki ba kynthup ia ki bar jylla bad ki trai muluk napoh ka jylla Meghalaya na ka liang ka KSU ka pynpaw paidbah mynta ka sngi ba ki dei ban mih noh syndon na ka jylla Meghalaya.

U la ong ruh ba don ki trai muluk lane ki ing khong shalangmat ki ba leit pynshoi sha ka sorkar kmie ban nym ai ILP ia ka Meghalaya. “Lada ka sorkar pdeng ka niew ba ka jylla Meghalaya ka dang hap hapoh ka riti synshar jong ka ri India ka dei ban ai ia ia ka ILP bad ka dei ban burom ia ka rai jong ka sorkar Meghalaya” u la bynrap.
Na ka liang u president ka KSU u Lambokstar Marngar u la maham ia ki trai muluk ki pyrshah ia ka ILP bad u la ong ruh lada ki thut ban im ha ka jylla ki dei ban mih noh syndon. U la pynpaw ba ka seng KSU kan iai bteng ban pyrshah jur ia ka CAA 2019 bad ka seng kan nym pyndem tdong ha khmat ka sorkar kmie.
“Ha kane ka juk mynta ngim lah ban ia khun bor bah tangba kam pher ruh lada ngi kyllon iap ha jing ialeh ne hapoh ing byndi da lei lei ngin nym pyndem” u la bynrap.
U nongialam ka KSU u la ong ruh ba kum shi bynta ban pynshai paidbah pyrshah ia ka CAA 2019, ka seng naduh u snem thymmai 2020 kan leit ha man ki shnong ka jylla.