Kan nym long kaba suk ia ka Jylla, ban ioh ILP, ong u Bah Hek

Shillong: U Bah AL Hek, myntri ka koit ka khiah ka sorkar Jylla, ula pynsngew hynnin ka sngi, ba kan nym long kaba suk ia ka sorkar Jylla, ba kan ioh ia ka jing mynjur jong ka sorkar India ia ka ain Inner Line Permit (ILP).

“Ka jing iaid lynti kan nym long satia kaba suk bad ka jingleit sha Delhi ban ioh ia ka ILP, kan long kumba kiew ia u dieng ban leit kheit soh. Ka jing iaid lynti kan long kaba jrong shi katdei, na ka bynta ban ioh ia ka ILP ha ka Jylla” ong u bah Hek, haba kren sha ki kotkhubor hynnin ka sngi.

Ha ka jingsngew jongu, ka sorkar India, kan hap ban pan jingmut na ki kynhun bapher, na ki jait bynriew bapher, ki sengbhalang bapher bad wat na ka sorkar Jylla, ha shwa ba kan rai halor katei ka kam.

U Bah Hek, u iathuh ba ka jing ia kynduh jongki bad U Amit Shah ha ka sien ba ladep, kam shym la long kaba shai, halor ka jingdawa ia ka ain ILP, hynrei kin hap ia kynduh biang ha u snem thymmai.

U Bah Hek, u kyntait ruh ba ka sorkar India, kan weng noh ia baroh ki kyndon jong ka Sixth Schedule, na ka Jylla, lada kan pyn treikam ia ka ILP bad halor kane ula iathuh ba kum katei ka jingiakren, kam don satia bad ka sorkar India.