Lah ban weng noh ka sorkar pdeng ia u Tathagata kum u Lat

Shillong: Ka sorkar pdeng ka lah ban nym bteng shuh ia u Tathagata Roy kum u Lat ka jylla Meghalaya wat hadien ba la kut ka jingshim shuti jongu.
U Tathagata u dang shim shuti ar taiew bad ia mynta dang peit shipor u Lat ka Nagaland u RN Ravi ia ka Meghalaya.

Katkum ka thymmei khubor, ka la don ka jingbym sngew tynnad na ki briew ba don ha ka sorkar jylla hadien ba u Lat Tathagata ula kren pynshit da kaba kyrshan ia ka Citizenship Amendment Act 2019 bad khamtam ka jingpyni bor bad kyntait ia ka jingphah ka sorkar ban pynjari synshar Administrator rule ha Khasi Hills Autonomous District Council (KHADC).

Wat na ka liang ka BJP Meghalaya ruh ka la pynpaw ia ka jingsngew bitar ia ka jingkren jongu ban kyrshan ia ka CAA bad kila pynsngew ruh sha ki bor ba hakhlieh jong ka party.