Sawa jam ka sur jingdawa ILP, na ka jingialang paidbah ki saw Seng ka Umsning

Nongpoh: Ha ka jingialang paidbah kaba la khot pynlong da ka Ri Bhoi Youth Federation (RBYF) ha Umsning, ki la don da ki hajar ngut ki paidbah na ki shnong bapher bapher ha Ri Bhoi, ki la iamih paidbah na ka bynta ban pynpaw ia ka jingpyrshah jur halor ka jingpyn treikam jubor ka sorkar BJP ia ka Citizenship Amendment Act 2019, bad lyngba jong katei ka jingialang paidbah la iohsngew ia ka sur jong ka jingsawa jam ka jingdawa ILP hapoh ka jylla.

Ha katei ka jingialang paidbah kaba la pynlong da ka RBYF, la sakhi da ka jingdon ki nongialam ba hakhmat jong saw tylli ki kynhun sengbhalang hapoh ka jylla, kaba kynthup ia ka KSU, FKJGP bad HNYF, kiba la ioh ruh ban kren bad pynshai paidbah halor ka jingma kaba ap ia ka jaidbynriew Khasi, na ka jingpyntrei kam ia katei CAA bad kiba la pynshai paidbah ba ka jylla ka la donkam ban iohnoh ia ka ILP, ka ban long kum ka stieh ka ban iada ia ka jaidbynriew rit paidbah. 

   Ki nongialam sengbhalang kiba la don ha katei ka sngi, ki kynthup ia u Bah Welbirth Rani, President ka FKJGP, u Bah Donald V. Thabah, General Secretary ka KSU, u Bah Scan Rini, Vice President ka HNYF, u Bah Bipul Thangkhiew, President ka RBYF lem bad kiwei pat ki nongialam sengbhalang na ki District.
Haba shim kyllum ia ka jingkren jong kitei ki nongialam seng, la iohsngew ia ka sur jingpynrem bad ther tyngeh halor ka jingleh donbor ka sorkar pdeng, namar ba ki la pynlong Ain jubor ia ka CAA wat hapdeng ka jingpyrshah kaba jur na ki paidbah kiba dei ki riewlum bad kiba don ha ki jylla shatei lam mihngi, ha kaba ki la ong ruh ba ka sorkar pdeng ka dei ban sngewthuh bad kam dei ban lehkai bad ka Jaidbynriew.Nalor ka jingpynrem ia ka sorkar pdeng, kitei ki nongialam sengbhalang, ki la ther tyngeh ruh pyrshah ia ka sorkar MDA ba la lam khmat da ka NPP bad ruh ia ka sorkar barim kaba la laiam da ka Congress, namar ba ki la dep ban lehkai ia ka kam iap kam im jong ka jaid bynriew. Ha kaba ha kine ki snem ba la leit kim ju pyrkhat ia ka jaidbynriew pynpaw dei tad haba la poi kaba kum kane ka khep, ki sa mih bad ban pynpaw ia ka mynsiem ieid jaidbynriew, kaba long ruh tang kum ka dak ban pynbiej ia ki paidbah.
   Shuh shuh ki la pynpaw ruh, ba kum ki nongialam sengbhalang, kim shem la kmen ia kata ka Special Session, kaba ki party bapher bapher ki la rai ban shong kyrpang kaba long ruh kum ka rai halor ka jingdawa ILP na ka sorkar pdeng.
Na ka sur kaba la mih na katei ka jingialang, la iohsngew ba ha kane ka kynti kaba mynta, ki la shim ia ka sienjam kaba kham tyngeh bad kata ka long ban iai dawa na ka sorkar ba ka dei ban pyntreikam noh ia ka ILP, ha kaba kum ki nongialam seng, ki la shim ruh ia ka rai ba lada jia kumno kumno, ki sa mih madan biang wat lada poi sha kaba ia um-snam ne wat ban shah set ha ka phatok, kata na ka bynta ban dawa na bynta ka Hok jong ka Jaidbynriew. 
Ha kaba khadduh eh, kitei ki nongialam seng, ki la kyntu ia ki paidbah ba kin ai ka jingkyrshan lang ha kaba kum kane ka por, ba ka jaidbynriew ka don ha ka saw ka sian.