Shah kem 5 ngut ki ASAK, kurup T.1.40 lak ba mut thied AK

Shillong,17 Naitung:
5 ngut ki dkhot ka seng lehnoh jong ka kynhun lehnoh ka A’chik Songna An’pachakgipa Kotok (ASAK) ki la shah kem ha ki pulit ka jylla, la kem ia kitei ki 5 ngut na kawei ka jaka kaba don markhap bad shnong Soksan kaba jngai tang kumba 3 kilomitar na Mendipathar, ka shnong ha North Garo Hills District. Na kitei ki 5 ngut ki pulit ki la ioh ban kurup haduh T.1.40 lak tam tyngka ka pisa kaba ki dkhot katei ka seng ki la thmu ban leit thied tiar siat na uwei na ki nongkhaii tiar siat na Assam.
Ki pulit ka North Garo Hills ryngkat bad ki pulit SWAT Commando ki la leit ban khynra ia ka ktem lehnoh ha katei ka jaka, bad ha katei ka jingleit khynra namarba ka jingipher ia ka iaid ka ieng kawei ka kali ki pulit ki biddien bad ioh bat ia ka kali Maruti Car kaba don ia u nombar AS 01 U 3595, bad ha katei ka kali ki la shong kitei ki 5 ngut ki dkhot ka ASAK.
Ki bor pulit ki la iathuh ba na kitei ki 5 ngut la kurup haduh T.1,40,150 lak tyngka ka pisa nad kiwei pat ki kot ki sla jong katei ka seng lehnoh. Kitei ki 5 ngut kiba la shah kem ki dei kiba la tip kyrteng kum u Doma Ch Momin 26 snem uba ki ju khot sin kum u John uba dei na ka shnong Dalu Dapgre (West Garo Hills), u Sunen A Sangma na Upper Wakagre, Damalgre, u Salbong M Sangma , 30 snem na Dakopgre, Tura, u Thailand R Marak, 34 snem na Rongsu Agal bad u Onimesh D Sangma ,40 snem na Waidagre (South Garo Hills).
Ki pulit ki la iathuh ruh ba ha ka por ba la tohkit, kitei ki 5 ngut ki lehnoh ki la phla ba ki la thmu ban leit sha khappud ka Assam na ka bynta ban thied ia ki kuli AK bad ki pistol 9mm na uwei u nongkhaii tiar siat.