Bam smai u Ravi kum u Lat thymmai ka jylla

Shillong: U R.N. Ravi u Lat ka jylla Nagaland u la bam smai mynta ka sngi ban peit lang kum u Lat ka Meghalaya.

Ia u R.N. Ravi la pynbam smai da u chief justice ka Meghalaya u Muhammed Rafiq ha Raj Bhavan mynta ka sngi.

U Ravi un peit lang ia ka Meghalaya hadien ba u Lat Tathagata Roy, ula shim shuti shwa.

Haba pyrshang ban iakren, na ka liang u Lat thymmai, um treh satia ban kren sha ki lad pathai khubor.
Ki sengbhalang bad ki seng saiñ pyrthei ha ka jylla, kila dawa ba dei ban weng noh shi syndon ia u Tathagata kum u Lat ka jylla hadien ba u la pynmih ia ka jingkynthoh ha ka tweeter ba kito kiba sngew pyrshah ne bym iahap jingmut ban pdiang ia ka Citizenship Amendment Act 2019, ki dei ban leit sha North Korea.