Ka Sixth Schedule bad ki Khasi Jaintia

Bah Monarch Shabong

Ki la don shibun ki jing ujor bad ki jingdawa ban khylliap noh ia ki District Council ha ka Jylla Meghalaya bad ki la bun ruh kiba sngew iahap, ban pynduh pyndam noh ia kitei ki Council, hynrei ka jing pynsangeh ka sorkar India, ban pyn trei kam ia ka Citizenship Amendment Bill (CAB) na ki jaka ba la pynhap ha u pud u sam ka Sixth Schedule, (lehse) ka pyn kyndit pynban ia baroh, ba kumno ka ithuh bad kumno ka kynmaw bad ka niewkor ia kitei ki jaka, kiba la pynhap ha u pud u sam jong ka Sixth Schedule.

Kane ka jingleh jong ka sorkar BJP, ha kane ka kynti, kaba la pynduh ia ka hok jong ki Kashmir, lyngba ka artikel 370, ka pyn pyrkhat mynta ia ngi u khun khasi khara, ba lada ka sorkar BJP, kaba don 300ngut tam ki dkhot ha Lok Sabbha, ka niewkor ia ka ain jongngi kiba don tang uwei u dkhot ha katei ka dorbar, kumta katei ka dei ka mat kaba ngin hap ban peit bniah bha ialade, ioh lehse ngim pat sngewthuh bha ia ki kyndon jong ka Sixth Schedule, lane ioh ngim mon ban pyndonkam bha ia ki ain kiba don ha ka, lane ioh lehse ba ki don kiwei kiba la shim kabu bad iaid bakla ia ki mynsiem jong katei ka ain jong ki District Council.

Halor ka phang jong ka CAB, ngi iohi ba ka sorkar India, kam shym la map ia ka Assam, namar ba kiba bun ki jaka jongka, kim hap satia ha ka 6th Schedule, nangta kam shym map ia ka Tripura, namar ba ka dei ka jylla, kaba la jyllei da ki bar Jylla; hynrei ka ri bad sumar kyrpang ia ka Manipur, da kaba pynjari ha ki kyndon jong ka ILP, nangta ia ka Nagaland, Mizoram kiba dei beit ki jylla, ba ki don ki trai shnong riewlum.
Haba peit halor kane ka mat, ngi iohi namarkata ba ka jing ialam lynti jong U bah JJM Nichols Roy, na ka bynta ban ioh ia ka Sixth Schedule, ka dei ka juban ksiar, kaba sah nam sah burom bad kaba long ka waitlam ban iada na ka jingshah thombor ha ki heh paid kiba nabar bad katei ka ain, kaba la thaw la jah 70snem eiei mynshwa, ka dang ieng rasong haduh ha kine ki sngi.
Ka sorkar NPP, kaba don mynta ha ka jingsynshar ha ka Jylla, ka hap ban iaid halor kitei ki dienjat jong U Bah Joy, namarkata ban nang pynskhem ia ki ain jong ka Sixth Schedule bad ban dawa na ka sorkar India, ba kan ithuh bad ba kan niew burom ia ka jinglong kyrpad ki riewlum Khasi, Garo bad kumjuh ba kan niew burom dalade ruh ia ki matti jong ka Sixth Schedule.