Ka Black Day, ong ka NESO

Shillong: Hadien ba ka ‘Rajya Sabha’ ka lah mynjur ia ka ‘Citizenship Amendment Bill 2019’ (CAB), ka North East Students’ Organisation (NESO) mynta ka sngi ka lah pynrem jur ia ka sorkar India. Ka NESO kan kynmaw ia ka 11 tarik u Nohprah 2019 kum ka “Black Day” na ka bynta ka thain lam mih ngi baroh kawei.

Ka NESO ka ba dei ka shatri jong ki seng bhalang na kylleng ka thain lam mih ngi ki ba kynthup ia ka Khasi Students’ Union (KSU), All Assam Students’ Union (AASU), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU), All Arunachal Pradesh Students’ Union (AAPSU) bad ka Naga Students’ Federation (NSF) ka lah ong ba mynta ka sngi ka 11 tarik u Nohprah 2019 ka dei ka sngi ban iai kynmaw kum ka “Black Day” na ka bynta ka thain lam mih ngi baroh kawei.
Kum ba shu pyn kynmaw kane ka ‘CAB 2019’ kan ai ‘Citizenship’ ia ki poiwir na ka niam Hindu, Sikh, Jain, Parsis, Buddhist bad Christians ki ba wan poi ei sha ri India shwa ka 2014.
Ka NESO ka lah kynthoh ba sorkar kmie ha ka jing shisha ka dei ban kem bad beh ia ki poiwir ki ban wan rung khlep hapoh kane ka thain, hynrei pynban ka lah pdiang sngewbha ia ki poiwir lyngba ka CAB 2019. Ka NESO ka lah ong ruh ba ka jing leh jong ka sorkar kmie kan sah nang pyn shlur shuh shuh khamatam ia ki poiwir na Bangladesh ban wan rung tuh sha ka ri India khamtam ha ka thain lam mih ngi.