Shillong: Ka North East Indigenous People Forum (NEIPF) mynta ka sngi ka la wan ban kynduh ia u Lamphrang ka ingdorbar u bah Metbah Lyngdoh ban dawa na u ban khot kyrkieh noh ia ka dorbar kyrpang ban iakren bad pynlong ain mardor noh ia ka Eastern Bengal Frontier Regulation 1873 ILP ha ka jylla Meghalaya.
Haba ia kren bad ki lad pathai khubor na ka liang U Bah Willbert Rani, u chairman jong ka Meghalaya Chapter u la iathuh ba ki la pynbor ia u Lamphang ba un khot kyrkieh ia ka dorbar ba kyrpang ban iakren bad ban pynlong ain mardor noh ia ka ILP.
U la ong ruh ba na ka liang ka NEIPF ki la iathuh ba ym dei tang ia u lamphang, hynrei na ka liang jong ki kin leit ban kynduh ia baroh ki myntri sorkar, ba kin ai ia ka jingkyrshan ia ka ILP ha ingdorbar bad ban phah noh sha Delhi.
Ka Dorbar kyrpang ka dei ka jaka ka ba biang tam ban ai jingmynjur ia ka ILP ban pyni baroh ki kyrshan shisha ia ka ILP ne ka dei tang ka jingpynthame ia ki jait bynriew ka jylla lada u la bynrap.
La ong shuh shuh ba ki la kyntu ruh ia u bah Metbah ba kum u nongialam jong ka party UDP, u dei ban pynkohnguh ia ka Sorkar Jylla ban pynbor ia u Lat ka jylla u Tathagatha Roy, ba un iakren ha Delhi ban pyntrei kam noh mardor ia ka MRSSA katba ka Sorkar Pdeng kam pat lah ban pynlong ain ia ka ILP ha ka jylla.
Kane ka dei ka por ko nongialam ka ri hashuwa ba ka umsaw kan tyllep noh ia ka jaitbynriew. Lada phi sngap jar ha kum kane ka por, to tip ba ka jingiarap ia ngi ki khun Khasi kan wan nawei pat lyngba U Blei, hynrei maphi ka jubab aiu phin ai haba ka iktiar phi don.