Shillong:Hadien ba ka Member of Parliament (MP) na Tura ka Agatha Sangma ka lah pyni ia ka jing kyrshan ia ka Citizenship Amendment Bill (CAB), mynta ka janmiet u myntri rangbah ka jylla u Conrad K Sangma u lah pynshai ba ia ka jing kyrshan ka Agatha Sangma lah dep ban bishar bha ha shwa ba kan pynshai ia ka jing kyrshan jong ka ia ka CAB hapoh ka ing thawain (Lok Sabha) ka ri India.
U myntri rangbah ka jylla u Conrad K Sangma u lah ong ba ka National People’s Party (NPP) ka pyrshah jur ia ka CAB 2016 ha u snem 2018 namar ba kam don ia ki kyndon ban iada ia ka jylla Meghalaya bad ia ka thain lam mihngi baroh kawei. U lah ong ruh ba dei ka NPP ka ba ia said bad ka sorkar India ban pyn ioh ia ki kyndon iada na ka CAB ha ka jylla bad thain lam mihngi. U lah ong ruh ba ka sorkar Meghalaya kan sa lum ia ki nong mihkhmat ban leit ia kynduh ia u myntri kam pohing ka ri India u Amit Shah ban dawa na u ban pyllait lut ia ka jylla Meghalaya bad ia ka thain lam mihngi na CAB.
U Conrad K Sangma u lah ong ba ka sorkar Meghalaya ka sngew nguh ba u myntri kam pohing ka ri Inida u Amit Shah u lah pdiang ia ka jing tyrwa ka sorkar Meghalaya ban iathir jing mut shwa bad ki nong ialam ka thain lam mih ngi ban buh da ki kyndon iada ia ka thain lam mih ngi na ka CAB.
“Dei lyngba ka jing ia said ka NPP ba ka CAB 2019 kan nym ktah ia ki jylla ba don ILP bad ki jylla ba don ia ki jaka ki ba hap hapoh ka Sixth Schedule” u lah bynrap. U lah ong ba ka sorkar Meghalaya kan sa dawa ruh na ka sorkar kmie ban wanrah da ki ain ba khlain ban teh lakam ia ka jing wan rung tuh ki briew na Bangladesh.
U myntri rangbah ka jylla u la kyntu ia baroh ki riew paitbah naduh ki sengbhalang ban pule bad sngewthuh bha ia ka CAB 2019 namar lada ka treikam kan nym don jingktah ei ei ruh em ha ka jylla Meghalaya.
Haba kylli haduh katno ka jylla kan shah ktah lada long ain ka CAB, U myntri rangbah ka jylla u lah ong ba ka shong ha ka bor jong ka sorkar Meghalaya ban shah ne em ban pyn long trai nong India ia ki ba wan na bar ri lada ka CAB ka lah long ain. U lah ong ruh ba ka sorkar India ka lah buh ia ka snem ot kyrteng ia ki poiwir ban long trai nong India haduh 2014 bad haduh mynta ka sorkar Meghalaya kam shym pat ioh ‘application’ na ki poi wir ki ba kwah long nong India.
haba kylli shaphang ka jing pra noh jong ka sorkar Meghalaya Democratic Alliance (MDA) namar ka jing kyrshan ka Agatha Sangma ia ka CAB, U Conrad K Sangma u lah ong ba ka sorkar MDA kam don ka jing ia pher jingmut bad ki paralok ki ba don ha ka MDA namar ka sorkar ka sngap lut ia baroh ki seng sain pytheir ki ba ia don lang bad ka MDA.
“Hoid ki briew ki sngewsih, ki bitar ba iohi ba ka Agatha Sangma ka kyrshan ia ka CAB ha ing thaw ain (Lok Sabha) ka ri India namar ki tieng ioh ka jylla jong ngi ka shah tyllep noh bad ki nong Bangladesh tangba nga kyrpad ia baroh ba ki dei ban pule bad sngewthuh bha halor kane ka CAB ba thymmai” u lah bynrap.U myntri rangbah ka jylla u Conrad K Sangma u lah kyntu ruh ia ki nong pyrshah CAB ba kim dei ban shim ia ka ain ha la ki jong ki kti bad kim dei ban pynjulor namar ka ain ka don bad lada lap ia kino kino kiba leh pyrshah ia ka ain kin sah shah pyngat kat kum ka ain.
Phi don ban ong eiei?