Shillong: U MDC ka Maw lai u bah Teibor Pathaw ula ong ba kiba bun ki longiing kiba duk ha Mawlai khamtam ka Umthlong bad kiwei kila shu lut ka bai bylla tang na kaba thied um namar ka jingkyrduh um palat.
“Teng teng kiba bylla ki la shu lut ka jingkamai tang ha kaba thied um namar ka jingkyrduh um”, la ong u bah Teibor.
Mynta ka sngi, u MDC lem bad ki nong kitkam shnong ka Nong pathaw, Umthlong ki la iakynduh ia u myntri ka tnad sam um ka jylla u bah Samlin Malngiang ban kyntu ia ka sorkar ban pyntreikam ia ka tyllong um Umshyllong ban pynpoi um sha kine ki shnong bad kiwei kiba don ha katei ka thain Mawlai.
U bah Teibor u la ong ba la ioh ia ka jubab kaba don jingkyrmen na u myntri, uba la pynthikna ban phah jurip shen ia ki engineer ia ka tyllong um Umshyllong-Mawlai Umthlong Water Supply Scheme khnang ban pynpoi um sha Mawlai Umthlong sharum bad kiwei ki shnong kum ka Nongpathaw bad Nongmadan.
U bah Teibor u la ong ba lada ka biang ka kam, katkum ka jingong u myntri, ha u bnai Lber ban wan, ka kam kan sdang noh.
“U Myntri u la phah ia ka jingthoh jong ngi sha ki ophisar ba kin leit jurip ia ka tyllong um bad lada ka biang, la kyrmen ba ha u Lber ban wan, ka kam kan urlong”, la ong u MDC ka Mawlai.
Phi don ban ong eiei?