Nongpoh: Ha ka sngi kaba u Bah Lakmen Rymbui, Myntri ka tnat Pule puthi ka sorkar jylla, u la hiar sha Nongpoh, u la kyntu ia baroh ki nongtrei na ka tnat ha Ri Bhoi, ba ki dei ban peit pyrman bad ban leh da kaba tyngeh, da kaba ujor lane ban pyntip sha ka sorkar, lada ki shem bad lap halor ka jingdon ki nonghikai kiba lehsting ia la ka kamram kaba la bynshet ha ki.
Halor ka pule puthi hapoh ka jylla, u Bah Lakmen Rymbui, u la ong ba kane ka sorkar kaba mynta, ka don ia ka jingangnud kaba khraw, na ka bynta ban nangkyntiew shuh shuh ia ka pule puthi hapoh ka jylla hi baroh kawei bad dei na kata ka daw kaba la pynlong ia u ba un kyntu ia ki briew kiba trei hapoh ka tnat pule, ba ki dei ban shim lang ia ka jingkitkhlieh, khnang ba ka jingthmu ka sorkar ban kyntiew ia ka pule puthi kan urlong.
Haba kyntu ia ki nongtrei hapoh ka tnat pule, u Bah Lakmen Rymbui, u la ong ba ka sorkar ka la ioh jingtip ba ki don ki Nonghikai, ki bym shem la shimkhia ia la ka kamram kaba la bynstet ha ki bad kata ka long ba ki ai pateng ha kiwei pat ki briew ba kin leit ban hikai ha ka jaka jong kitei ki nonghikai, kiba la thung da ka sorkar.
Nalor ka jingkyntu ia ki briew kiba trei hapoh ka tnat pule puthi, u Bah Lakmen, u la kyntu ruh ia ki briew na ka ophis Deputy Commissioner bad ruh ia ki dkhot ka Managing Committee, ba ki iarap lem ha ka ban peit ia ka jingbym shimkhia ki nonghikai.
Halor ka jingdon ki nonghikai ki bym shimkhia ia la ka kamram, u Bah Lakmen Rymbui, u la ong ba ki la don wat ki nongmihkhmat, kiba la rah shapoh ka Iingdorbar thawain, kiba la ong da ka ktien, ba ki don bun ki nonghikai la thung da ka sorkar, hynrei ki ai (Sub-Contract) ne phah trei pateng ha kiwei pat.
Namarkata, na ka bynta ban lait na kitei ki jingeh baroh bad ban kyntiew ia ka pule puthi hapoh ka jylla, nga kyntu ia ki nongtrei ka tnat pule lem bad kiwei, ba kin shim ia ka jingkitkhlieh, na ka bynta ban peit halor ka jingshim kabu ki nonghikai bad ki bym shem la pyndep ia la ka kamram, kumta lada ki lap ia kino kino ki nonghikai kiba lehsting ia ka kamram, ki dei ban pyntip beit sha ka sorkar, khnang ba ka sorkar kan iohleh ia kaba donkam baroh, u la bynrap.
Phi don ban ong eiei?