Plie u Symbud lamphang, ia ka Tamasa lekhmen ki Garo ha Rangsakona

Nongpoh: U Timothy Shira, Symbud Lamphang ka sorkar jylla, myn hynnin ka sngi u la leit ban plie paidbah ia ka kawei na ki Tamasa lehkmen ki jaidbynriew Garo, ia kaba la tip kum ka ‘1st Literature and Cultural Festival” ka Tamasa kaba la pynlong da ka A’chik Literature & Cultural Committee, kaba ki la pynlong hapoh ka shnong Rangsokona, Byrnihat Ri Bhoi District, kaba long ruh kum ka dak ban pynpaw ia ka jingsngew sarong na ka bynta ban pynneh pynsah ia la ki riti dustur.

Haba plie paidbah ia katei ka Tamasa ba ar sngi kynthih, nalor u Symbud Lamphang ka sorkar jylla, la sakhi ruh da ka jingdon u Bah Sosthenes Sohtun, MLA ka Jirang Constituency, u John Marak, Rangbah Shnong ka Rangsokona, u Bah Raju Jyrwa, Rangbah Shnong ka Borbhuin, u Nikel Sangma, ki riew rangbah, ki Longkmie, ki Longkpa na ka jaidbynriew Garo lem bad kiwei.

Haba kren ha kane ka sngi, u Timothy Shira bad u Bah Sothenes Sohtun, ki la pynpaw ka jingkmen kaba khraw, ban iohi ba ka shnong Rangsokona ka don ia kata ka mynsiem ban pynneh pynsah ia la ki jong ki riti dustur bad khamtam eh na ka bynta ban pynneh pynsah ia ka Jaidbynriew Garo.
Haba kren ai mynsiem ia la ki jong ki paradoh para snem kiba don hapoh jong katei ka shnong, u u Timothy Shira, u la ong ba lada ki leit kylleng sawdong ka pyrthei, hynrei kim dei ban klet ia la ka jong ka tynrai bad ia la ki jong ki riti dustur.
Halor kitei ki kyntien, la sngewthuh ba ka nongrim hi kaba la pynlong ia u Timothy Shira, ba un kren kumtei, ka dei hadien ba u la iohi ba bun na ki briew, kiba la shang bad kiba la sah ha kiwei pat ki jaka, ki klet noh ia ka jong ka tynrai bad kaba dei ruh ka dawbah kaba la pynlong ia ka jingnanghiar jong kiba tip ia la ki jong ki riti dustur.
Namarkata, u la kyntu naduh ka bor shnong bad ruh ki nongshong shnong ba ki dei ban don kata ka mynsiem ban ieit ia la ka tynrai, namar dei tang lada ngi lah ban pynneh pynsah ia la ki riti ki dustur bad ka jinglong tynrai ngi lah ban pynim ia ka jaid bynriew la ngi don ha kano kano ka bynta jong ka pyrthei, la ong kitei ki nongmihkhmat paidbah.