Baroh saw ngut ki nongbat bor, ia ka doktor Veterinary, ki la iap mynta ka sngi, ha ka jingshah khyrwit kuli ha ki pulit ha Shadnagar, ha ka jing ia siat mar kylliang mynta ka step, ong ka khubor.
Ka jingjia, la iathuh ba ka dei ha ka por 6.30 mynta mynstep, ha kaba la ialam ia kitei ki saw ngut, sha ka jaka jong ka jingjia, ba kin pyni, ia kaei kaba ki la dep leh, na ka bynta ka jingtohkit jong ki pulit.
“Ki knieh noh ia ki suloi na ki pulit bad ki la siat ruh ia ki pulit bad ki pyrshang ban phet na katei ka jaka. Ki pulit ki la siat kylla ia kitei ki nongbat bor kynthei bad arngut na ki pulit ruh ki la mynsaw, ha ka jing ia siat mar kylliang” ong ka khubor.
La iathuh ba la siat iap ia kitei ki saw ngut ha kajuh ka jaka hi, ha ka surok bah NH 44, hajan Hyderabad, kaba dei ruh ka jaka ba ki la pyniap ia ka doktor kaba 26 snem ka rta, ha ka 28tarik Naiwieng 2019. La iathuh ba ia katei ka doktor mrad, la bat bor bad hadien kata la thang im da kitei ki saw ngut ki briew.
Ki pulit jong ka Cyberabad, ki iathuh ba kitei ki saw ngut ki la pynpei lyer ia ki shaka jong ka scooter ba ka shong katei ka doktor bad hadien kata, ki sa rah bad bat bor ha kawei ka jaka, kaba don hajan kawei ka jaka khrong pisa ia ki trok.
Kitei kiba donkti ha katei ka kam, ki long U Mohammad Areef, Jollu Shiva, Jollu Naveen bad U Chintakunta Chennakeshavulu. U Mohammad Areef (25), u dei u nongialam katei ka kynhun bad u dei u nongniah trok.
Phi don ban ong eiei?