Donkam shwa da ka NRP ban tip ia ki nongshong shnong ka ri, ong U Mukul

Shillong: U nongialam liangpyrshah u Dr Mukul Sangma u la ong ba ka sorkar pdeng ka dei ban pyntreikam shwa da ka National Population Register (NPR) ban tip ia ki nongshong shnong ba shisha ka ri namar ba ka National Register of Citizens (NRC) ka dei beit thik tang ia ka Assam.

Kane ka jingkren u Dr Mukul ka long hadien ba ka sorkar BJP ka la pynbna ba kan pyntreikam da ka NRC ha baroh kwei ka ri ban beh shnong ia ki bym dei ki nongshong shnong ba shisha.
“Ngi dei ban sngewthuh ba ka NRC ka dei tang ia ka Assam. La dei ban pyntreikam ia ka NPR, kaba la pynbna da ka sorkar ha u snem 2003,” la ong u Dr Mukul ha kane ka sngi Balang.
Katkum ka jingong u Dr Mukul, ym dei ban iakhleh ia ka NRC bad ka NPR. “La dei ban pyntreikam ia ka NPR kaba la pynbna da ka sorkar ha u snem 2003. Ngin lah ban pyniapher ia ki nongshong shnong ba shisha bad kiba shu wan rung beain,” la ong u Dr Mukul.
U la ong ba ka ‘National Population Register’ (NPR) ka long kaba donkam ban lum jingtip lum jingkhein ia ki briew ha ka ri.“Hadien ba ngi la dep ban leh ia ka NPR, ngin sa tip katno ngut ki nongshong shnong ba shisha”, u la ong.
Lah ban kdew ba ka sorkar BJP ka la pynbna ba kan pyntreikam ia ka National Register of Citizens (NRC) na ka bynta ban beh noh ia kito kiba shu wan rung beain sha India.