Ka ktem pulit ka Assam ha Sabuda, ka long mynjynthut ia ka Block-2

Nongpoh:Haba iadei bad ka jingdon ka Ktem Pulit ka Assam ha shnong Sabuda, ki paidbah nongshong shnong kiba sah ha kito ki shnong kiba don ha katei ka thain, ki la ong ba kat haduh mynta kim pat ioh jingmyntoi ei ei ruh em, hynrei ki la ong pynban ba ka jingdon jong katei ka ktem pulit, ka kylla pyn ban kum u Mawjynthut na ka bynta ban pynpoi ia ki kam pynroi ha ki shnong kiba don ha katei ka thain, kaba hap hapoh ka Raid Nongtung bad ia kaba la tip paidbah kum ka Block-2.

Haba ioh ban iakren bad ki paidbah kiba sah ha ki shnong, kiba kynthup ia ka Sabuda, Khlieh Umwang, Madan Umwang, Jatalong lem bad kiwei, ki la ong ba katei ka Police Outpost jong ka Assam kaba don ha shnong Sabuda, kam shem la ai jingmyntoi ei ei ruh em ia ki paidbah, namar haba don kino kino ki jingjia hapoh jong kitei ki shnong, ki paidbah kim ju leit ban pyntip sha kitei ki Pulit Assam, hynrei ki leit beit ban pyntip sha ki Pulit Meghalaya ha Mawlasnai Police Outpost.

Halor ka jingwit lyngba ka jingdon jong katei ka Ktem Pulit, ki briew kiba la iakren bad u Nongthohkhubor, ki la ong ba ka jingdon jong katei ka Ktem pulit Assam ha katei ka jaka, ka long beit tang ban peit ioh don kino kino ki kam pynroi kaba ka sorkar Meghalaya ka ai sha kitei ki shnong bad ban leit pynthut lane ban leit pynsangeh ia kiba kum kitei ki kam pynroi, kumba ka la jia na ka por sha ka por.
Shuh shuh, ki la ong ruh ba ka jingdon jong katei ka ktem Pulit ha katei ka jaka, ka pynshlur bad pyn shngain mynsiem ia ki briew na ka tnat khlaw ka Karbi Anglong (Assam), ba kin shim khajna ia ki mar rep mar riang, kaba la pynmih da ki paidbah na kitei ki shnong ha ka por ba ki thmu ban leit die sha ki Iew ki hat.
Haba batai halor ka rukom shim khajna na ki briew na Assam, uwei na ki nongialam shnong na katei ka thain (u bym shem la kwah ban pynpaw kyrteng) u la iathuh ba kumba ka long mynta, ki briew ka tnat khlaw na Assam, ki buh ia kawei ka Gate ne ka jaka ban khrong khajna ha mar pyrshah ka ktem pulit Assam Sabuda bad lyngba jong katei ka jaka khrong khajna, ha kaba ki ju shim haduh T. 200 spah ia ki kali kiba kit ia ki mar rep kaba la pynmih da ki paidbah kiba sah ha katei ka thain.