Shillong: Ka Meghalaya ka la long ka lahduh jong ka lympung ialehkai Sub-Junior National Football Championship ka All India Football Federation (AIFF).
Ka Meghalaya ka la pynliem ia ka Arunachal Pradesh da 3-0 ha ka jingiakhun hynne ka sngi ha Kalyani, West Bengal, hapohg ka jingialam u bah Jeffrey Warlarpih kum u coach.
Ka Meghalaya ka la ioh ba kan thep ia ki ha ka kylla miet, da u Samchaphrang Lato ha ka minit kaba 52, katba ia ki ar tylli la thep pat ia ki ha ka por ba la pynjlan ia ka jingialehkai, ki la wan ha ka minit kaba 90+2 ba la thep da u Samlang Rympei bad 90+5 lyngba ka free kick b a la thep da u Teibok Nongrum.
Ha u snem 2017, ka Meghalaya ka la lah ba kan bat ia ka kyrdan kaba ar jong kane ka lympung ialehkai, katba na ka liang ka Arunachal ka la bat ia kane ka kyrdan ha u snem u ba la dep.
Haba phai sha ka jingiakhun, kine ki artylli ki kynhun ialehkai ba dei ki jylla ka thain shatei lam mihngi ka ri, ki rung sha kane ka phainal hadien ba kim shym la shah rem wat tang shi sien ruh ha baroh shi lynter ka lynti ka jong ki ha kane ka lympung.
Ka jingioh ka Meghalaya ba kan thep ia ka kol ba nyngkong ka la wan hadien ba u Baniatyllilang Mawkhiew u la ioh ban rah sted shakhmat ia ka bol bad ban rung artad shajan ka kol jong ka Arunachal bad ha ka por ba biang un pyllait pat ia ka bol sha u Colinsalmon Lyngdoh uba da kylla u la pynbuh pat sha u Samchaphrang bad marsien ioh dain u la shut jam bha ia ka bol kaba la lah ban kyrda ia ka da uwei na ki defender jong ka Arunachal bad hadien kane, ka bol sa shisien ka la poi biang hajan kjat ka jong u bad ban pyndei biang sa shisien ia ka ban pynkhih ia ka jar jong ka Arunachal.
Ka shi kol ba ka Meghalaya ka la ioh ba kan thep, ka la sdang ban tangon kum u lymban ia ka kynhun ialehkai ka Arunachal, kaba la sdang lem ban kham pynsted ia la ka rukom ialehkai ka jong ki, tangba ki khynnah ialehkai ka Meghalaya ki long kiba peitngor bad phikir bha ia man la ki rukom pyrshang na ka liang ka Arunachal.
Ha ka khyllipmat ba ia ka por ialehkai la pynjlan ia ka sha ka saw minit, ba ki khynnah ka Arunachal ki la ialeh ban kiew noh shakhmat, kaba da kylla ka la plie lad ia ka Meghalaya ba kan bteng ban ioh thep syndet pat ia ki ar tylli ki kol kiba dang sah ban pyntikna syndon ia lade ban rah ia ka nam lahduh kane ka lympung ialehkai bna nam tam ha ka ri.
Phi don ban ong eiei?