Pynkiew bai kali ka sorkar 18 shi km ia ki kali tourist, 26 ia ki taksi ha sor

Shillong: Ka sorkar jylla myn hynnin ka sngi, ka la shim ia ka rai  ban pynkiew ia ka bai shong kali kamai ha ka jylla bad ha thain Shillong.

     Haba kren sha ki lad pathai khubor, u myntri ka tnad kam pohiing ka jylla, u James K Sangma  u la iathuh ba ka jingpynkiew ia ka bai shong kali jong ki  taksi kamai tourist bad kumjuh kiba ha thain Shillong, la pynshong nongrim namar ka jingkiew dor ki tiar ki tar.   
    U la ong ba na ka dor kaba la buh naduh u snem 2011 kaba long T. 15.50 shi km shi khlieh, la pynkiew sha ka T.18 shi kilometre shi khlieh bad man ka 100 kilometre yn khein shuh sa 200 tyngka ia kito ki kali tourist taksi kiba don Air Condition.
     Ha kaba iadei ia ki kali ba kamai ha thain Shillong, la pynkiew na ka  T. 22 ha ka 1 kilometre shi khlieh sha ka T.26 shi kilometre shi khlieh bad T. 13 man ka shi kilometre. Lada bat pynslem, yn hap siew shuh sa 7 tyngka man ka san minit.
      “Ka kali kamai ki dei ban kit briew katkum ka jingngiam ba la buh ne capacity bad kiba kit tam, kin hap shah trei ha ka ain”, la ong u myntri.  
     U James u la iathuh ba ha kane ka sngi, ka sorkar ka la pdiang ia ki kyndon ka Meghalaya Lokayukta Rule 2019, kaba la pdiang da u Lat ka jylla naduh u snem 2014. U la ong ba kane ka jingpdiang ia kine ki kyndon, ka long ban pynlah ia ka Lokayukta ban pyntyllun ia ki kam nangne shakhmat.
      Ka sorkar ka la pynjlan ruh ia ka samoi treikam u secretary ka  Meghalaya State Consumer Redressal Commission u HN Arength na bynta sa shi snem.
     Ka Sorkar ka la pdiang ruh ia ka Service Rules ka Meghalaya  Commerce and Industries Department,  bad kumjuh ia ka Goods and Services Act 2019 kumba la bthah da ka jingialang ka GST Council bad kane ka jingpynkylla ka long ban khang lad ia ka jinglait ei ki khajna bad kan treikam noh naduh ka 1 tarik Kyllalyngkot 2020.