Rah ka samla Lashmi Kharkylliang ia ka nam lahduh ha ka Dancing Competition

Shillong: Ka samla Lashmi Kharkylliang ka la ioh ban rah ia ka nam lahduh ha ka jingiakop shad jong ki Senior (13 snem shajrong) katba u Mewan and Anu ki la rah ia ka nam lahduh ha ka Junior (kiba hapoh 12 snem) ba la pynlong da ka phlim JINGIM kaba dei ka phlim khasi ka ban sa mih noh shen ha Bijou cinema kaba la long ha ka 30 tarik Naiwieng 2019 ha Khasi National Dorbar Hall, Mawkhar.

Baroh ki nongiashim bynta ha jingiakop shad ki don kumba 60 ngut eiei kynthup naduh ki hep kiba rit haduh kiba la heh bad ki nongjop ki long ha ka Senior dei ka Lashmi Kharkylliang ka ioh ia ka nam ba nyngkong, ba ar u samla Iolangki Synnah, balai ka Nongrum Brothers. Katba ha ka Junior ki nongjop ki long ba nyng kong dei u Mewan bad Anu, ba a r ka Veronica Shabong bad balai ka Celiana Thongni. Ki nongbishar ki long u Phira Dohtdong, Arman Disiar, Iarap Biam, Wanri Pyngrope kiba dei ki puron bad tyngshop ka phlim JINGIM bad Nadia Syiemlieh kaba dei ka puron jong ka phlim Dhaka Escape.

Ka jingpynlong ia kane ka jingiakop shad ka long shi bynta ban pynshongshit ha ka por ba pyllait ia ka Music Video Mynsiem ka kmen jong ka phlim JINGIM kaba la thep ha Youtube ha channel jong Kiki Garod. Ia kan eka phlim la pynmih da ka Chwa Syiemlieh Film Production bad la Direct da u samla Kiki Garod bad la hikai shad da I bah Wanbet Shangpliang.
Ha ka por ba pyllait ia kane ka Music Video la iadonlang ki ar ngut ki samla Bodo kiba wan na Guwahati, u tyngshop bad puron na ki phlim Khasi, Daniel Nongrum, Golden Suchiang, Regina Lamo, Medeora M Umlong, bah Nelson Kharbani, Vice-President ka HANM.
Kum ka dak ban pyllait ia ka Music Video baroh kiba shah khot sngewbha bad ki nongbishar ki la pyllait lang ha ka juh ka por ia ki Calender 2020 ba la pynmih da ka phlim JINGIM ka ba die ha ka dor T.50 kawei.
Ha ka juh ka por ka Chwa Syiemlieh Film Production ka la ai khublei ia baroh ki paidbah kiba kyrshan ia ka Music Video Mynsiem ka kmen jong ka phlim JINGIM namar hapoh 24 kynta (naduh ba la thep ha Youtube channel Kiki Garod ha ka por 7:00 baje janmiet ha ka 30 tarik November haduh ka 7:00 baje janmiet jong ka 1 tarik Nohprah 2019 kiba peit ka la poi palat 84,000 ngut.