Pynpaw ka HNLC, ba ka kwah ban iakren iasuk bad ka Sorkar

Shillong: Ka Hynniewtrep National Liberation Council (HNLC) ka lapynpaw ia ka jing kwah jong ka seng ban poi sha ka jing iakren ia suk bad ka sorkar India bad ka sorkar Meghalaya. Ia kane lah kyrwoh da u Sainkupar Nongtraw u ba dei ruh Publicity Secretary jong ka seng.

Ha ka kyrwoh u lah kynnoh ba ka sorkar Meghalaya ka lah leh bynthi ia ka jing kyrpad jong ka seng ban ia poi ha ka jing ia kren iasuk hapdeng ka HNLC bad ka sorkar Meghalaya. “Naduh 2004 ngi lah phah jing kyrwoh sha ka sorkar ban pyn beit ia ka jing ia kren ia suk hynrei haduh mynta kam shym la don kano kano ruh ka jing jubab na ka Sorkar Meghalaya ne na ka sorkar India” lah bynrap u Siankupar Nongtraw.

U Sainkupar Nongtraw u lah bynrap ba ka seng ka kwah palat ban wanphai biang sha la ing bad ban ieh noh ia ki jing umsnam hynrei ka sorkar Meghalaya pat kam shym la patiaw ia ka jing tyrwa jong ka seng. U Sainkupar Nongtraw u lah kynnoh ruh ba ka sorkar Meghalaya ka lah leh shilliang da ka ba khot ia kren ia suk tang bad ka ANVC, bad kane ka jing leh bynthie jong ka sorkar Meghalaya ka lah wanrah jing sngew sah nud ha ka seng.
Ka seng ka pynpaw ruh ba ka kwah ban ieh noh ka jing kieng atiar tangba kam dei pat da ka jing wan pyndem wait ha ka sorkar Meghalaya ne India hynrei da ka jing iakren hapdeng baroh artylli ki sorkar.
Haba pynpaw ia ki jing dawa na ka sorkar India, ka seng ka dawa ba ka sorkar India ka dei ban ai ia ka ‘Hynniewtrepland’ la ka jong ka Lama, ka Ingbishar bad ka Riti Shynshar.
“Ngi ngeit skhem ba ka sorkar Meghalaya bad Sorkar India kin wad lad wad lynti kumno ban klet noh ia kiei kiei ki jing iapher jingmut bad ka seng, bad ban khmih lynti ban ia poi sha ka jing ia kren ia sukkhnang wanrah ka shong suk shong sain ha ka jylla bad ka ri baroh ka wei” lah bynrap u Sainkupar Nongtraw ha ka kyrwoh.