Beh krad ia baroh ki nongtrei bar jylla:HYC

Nongpoh: Namar ka jingiai jia ba khah khah ba ki bar jylla ki ju jrong kti bad ktah kti ia ki nongniah kali kiba dei ki Khasi, hynnin ka sngi ki nongialam ka HYC, Ri Bhoi District, ki la leit ban iakynduh ia ki nongpyniaid jong ka Toll Plaza kaba don ha Pahammawlein 20Mer, ha kaba ki la dawa ruh ba dei ban pynher krad lut ia baroh ki nongtrei bar jylla kiba trei ha katei ka jaka khrong khajna ka NHAI.

Ha katei ka jingleit kynduh ia kitei ki nong pyniaid jong katei ka Toll Plaza, la ialam da u Bah John Nongrum, President ka HYC ha Ri Bhoi, u Bah Hercules Suting, General Secretary lem bad kiwei pat ki nongialam bad dkhot ka seng, ha kaba ka nongrim kaba la pynlong ia ka HYC ban leit kynduh ia ki nongpyniaid jong katei ka Toll Plaza, ka dei namar ba la bun ki nongtrei bar jylla hapoh katei ka jaka krong khajna bad kaba la wanrah ia shibun ki kynrum kynram halor ka jingdon kitei ki bar jylla, khamtam eh haba iadei bad ka ktien ka thylliej.
    Lyngba katei ka jingleit kynduh, kitei ki nongialam ka HYC, ki la dawa ia ki nongpyniaid jong katei ka Toll Plaza ba ki dei ban pynher krad lut ia baroh ki bar jylla, kiba trei ha katei ka Toll Plaza bad ha jaka jong kitei ki bar jylla dei ban thung noh da ki Samla Khasi.