La rakhe ia ka sngi National Milk Day ha ka Jylla

Shillong: Ka jylla Meghalaya ha ryngkat baroh kawei ka ri India mynta ka sngi ki la rakhe ia ka “National Milk Day,” ha Soso Tham Auditorium ha ka ba la rakhe ia kane ka sngi man la u snem jong ka 26 tarik u Naiwieng, kum shi bynta ban kynmaw ia ka sngi kha jong u Dr Verghese Kurien.

Ha kane ka jingrakhe ia ka National Milk Day la wan iashim bynta lang da u Myntri rangbah u Conrad K Sangma bad u Symbud myntri rangbah u bah Prestone Tyngsong.

Ha ba ai jingkren ha kane ka sngi na ka liang u Myntri rangbah u la ong ba ka Dairy Programme ka dei ka mission ka ba kongsan tam jong ka Sorkar Jylla, lyngba ka Dairy mission la seng ha kiba bun ki bynta jong ki District jong ka jylla, ha kaba ia kine ki mission ba la pyniaid lyngba ka tnad Animal Husbandry.

Ka National Milk Day (NMD) ka dei kaba la rakhe ha kylleng ki jylla jong ka Ri India ban kynmaw burom ia ka sngi kha jong u Dr. Verghese Kurien, u kpa jong ka White Revolution.

Ia u Dr Verghese Kurien, la ithuh kum ‘u kpa jong ka White Revolution’ ha ka ri India, ha ka ba u la sdang ia ka kam ha ka ba iadei bad ka kam ban pynkiew ka ioh ka kot na ka jing pynmih ia ka dud bad u la wanrah ia ka roi ka par lyngba ka Dairy Progrmme hapoh ka ri bad baroh ka pyrthei. Hapoh ka jing ialam jong u, ka india ka lah ban pyn ioh haduh shi billion litre ka dud.