Lah ban pyniakhun CEM ka kynhun Congress da u bah Latiplang

Shillong: Katkum ka khubor ba la iohlum, la iathuh ba ka liangpyrshah kaba pynkhyllem ia ka shuki CEM ia u bah Teinwel Dkhar ka lah ban pynlong CEM ia u bah Latiplang Kharkongor u MDC shimet ban kyrshan ka Congress, katto katne ki MDC ka NPP bad MDC shimet.

Ka jingkhyllem u CEM bah Teinwel Dkhar ha ka jingiatynjuh bor mynta ka sngi, ka dei namar ka jingshet kylla ki 4 ngut ki MDC nalor sa u chairman.
Ha ka jingiakren sha ki lad pathai khubor, u nongialam ka Congress uba dei ruh u MDC na Mylliem u bah Ronnie V Lyngdoh u la ong ba ka Congress kam pat rai iano ban long nongialam ban shimti ia ka shuki CEM hadien ba la khyllem noh u CEM bah Teinwel Dkhar, hynrei kan iashong jingialang bad ki paralok ban iajied iano ban iakhun ia ka shuki CEM.

“Ngin sa iashong jingialang mynta ka sngi ban iakren ia kane”, la ong u bah Ronnie.
Ka jingthep kyrteng ia kiba iakhun ia ka shuki CEM la pynbna da u chairman ba kan long lashai ka sngi bad ka jingjied ia u CEM thymmai kan long ha ka 22 tarik mynta u bnai.
Lada kam don ka jingkylla biang, ka liangpyrshah kaba pynkhyllem ia ka EC ba ialam u bah Teinwel ka don 14 ngut bad 15 ngut nalor u chairman bah Pynshngain.