Ban iada na ka aksiden kali, hikai ki pulit pyniaid kali ka Nongpoh PS

Nongpoh: Shi bynta ban iada na ki kam aksiden kali bad kumjuh ruh ban pynsngewthuh ia ki paidbah bad khamtam eh ia ki khynnah skul, hynne ka sngi ki Pulit pyniaid kali ka Nongpoh Police Station, ki la pynlong ia kawei ka prokram kaba kyrpang bad kata ka long ba ki la ai jinghikai sha ki khynnah skul lem bad ki paidbah ha sor Nongpoh, haba iadei bad ka rukom ba kumno ki dei ban leh ha ka por ba ki thmu ban kam na shilliang sha shilliang ka surok.

Ha kaba ai jinghikai ia ki khynnah, ki Pulit pyniaid kali ka Nongpoh Police Station, kaba la ialam da u Bah P.K Lyngdoh, SI ka Nongpoh Police Station, ka Kong J. Marbaniang lem bad kiwei, ki la hikai ia ki khynnah rit, ba kumno kin leh haba ki thmu ban kam na shiliang sha shilang ka surok bad ban lait na kino kino ki jingjia ba sngewsih ne ki jingjia aksiden.

Lyngba katei ka jingai jinghikai, ki Pulit pyniaid kali ka Nongpoh Police Station, ki la hikai ym tang ia kitei ki khynnah rit, hynrei ki la hikai ruh ia ki briew kiba la heh la san, da kaba ong ba barabor haba ki thmu ban kam na shilliang sha shilling ka surok, ki dei ban pyndonkam lyngba ki (Zebra Crossing Line) ne ki jaka ba la ruid lain na ka bynta ban pyndonkam da ki briew kiba thmu ban iaid na shiliang sha shiliang ka surok.