Pynher shithi u MLA Mawphlang ba shong dum ka Nonglwai

Shillong: U MLA ka Mawphlang u bah SK Sunn ha kane ka sngi Baar u la pynher shithi sha u Director ka MePCL, Lumjingshai Shillong namar ka jingbym ju don u lineman ban peit ia ka jingthut bad moramot ia ki jingsniew ka bording ha ka thain shnong Nonglwai. Kawei pat ka dei namar ba kane ka shnong kam don bording la hynriew bnai eiei mynta.

Ha ka shithi, u bah Sunn u la ong ba ha shnong Nonglwai ka la shu shong dum la hynriew bnai eiei mynta namar ka jingsniew u kmie ding ne transformer. U la ong ba ha ka jingshisha ka dorbar shnong ka la iakynduh ia u SDO ba peit ia katei ka thain ha 7Mer, Shillong ha ka 25 tarik Nailur 2019 ban pyntip ia kane ka jingjia hynrei u SDO u la pyntip ha ki nongkitkam shnong ka Nonglwai ba u la dep pyntip ia kane ka kam sha ki bor halor.

U bah Sunn u la ong ba kumba la tip hi ha kane ka aiom tlang, ki khynnah skul, ki hap ban pynkhreh ia ki eksamin jongki bad ka jingbym don ka bording ka la buh jingeh ia ki.
Ha ka shithi, u la ong ba ha kane ka shnong u lineman um ju don shuh la shiphew snem eiei mynta hadien ba la khlad noh uba trei mynsyhwa. Halor kane, u MLA ka Mawphlang u la kyntu ia u Director ba un shim khia ban pynmeh biang ia ka bording ha katei ka shnong bad ia u lineman ruh kumjuh.