Sa shi sngi ha jingtohkit ki pulit, yn ngat u President ka KSU ha Ri Bhoi

Nongpoh: Shisngi hadien ba ki Pulit ka Ri Bhoi, ki la ioh ban kem ia u Samla Ferdynald K. Kharkamni, President ka KSU, North Khasi Hills District, mynta ka sngi ki la rah ia u sha Iingbishar ka District & Session Judge, Nongpoh.

Hadien ba ki la rah ia u sha ka Iingbishar ka District & Session Judge, Nongpoh, ki la Pulit ka Ri Bhoi, ki la pan jingbit na ka Iingbishar ba kan ai sa shisngi hapoh ka jingtohkit ki Pulit (Police Custudy), na ka bynta ban pynlong ia ka jingtohkit kaba bniah ia utei u nongialam ka KSU, uba la shah kem ha ki Pulit.

Kum ban shu pynkynmaw hangne, ba u Samla Ferdyland K. Kharkamni, u la shah thwet mynta la shibnai ha ki Pulit ka Ri Bhoi, kata hadien ba la mih ka jingujor ejahar da ki Pulit ka Umiam Police Station, kata hadien ba ki la kynnoh ba u la donkti ha kaba ktah kti ia u OC bad ia u Head Constable ka Umiam Police Station.
Ha kane ka sngi, haba ki Pulit ki la rah ia u Samla Ferdynald K. Kharkamni sha Iingbishar, la iohi ba ki nongialam ba hakhmat ka KSU lem bad kiba ha iing, ki la synran lang ia u naduh ka por mynstep haduh janmiet.