Bam duh ka ding ia ka iingmane balang U Blei

Bah Monarch Shabong

Ka ding ka la bam duh ia ka iingmane jong ka Balang U Blei ha Qualapatty bad katei ka dei ka shnong, kaba don ha pdeng bah jong ka sor Shillong, hynrei kaba sngew sih ka long ba ym don ba lah ban iarap ban pynlip ia ka ding, kaba la sdang pur naduh ka por 3baje lane tam mynstep.

Kam dei tang katta, hynrei, kaba sngewsih shuh shuh, ka long ba nalor ba ka la bam duh ia ka iingmane, hynrei ka bam duh sa ar ngut ki mynsiem briew, kiba dei ruh ki shi kurim bad ka jingkhlad jong kitei ki arngut, la sngewthuh ba kan dei ha ka por ba la sdang shai bha ka bneng, kaba long hadien ka 4.30 lane 5baje mynstep.

Ka sorkar Jylla, ka la bei tyngka la jubor bha, ha kata ka tnat Disaster Management, ha kaba ki la ju pynlong ia ka jingleh kilan met, ha ki surok bah, na ka bynta ban iada ia u jumai, ia ka jingshlei um, ka ding bad kumta ter ter; hynrei ka jingshisha, ka long ba kitei ki jingjia kim ai por lypa, lano ba kin jia bad ki wan kyndit bad haba ki wan ha ka por 3.30 mynstep, shaei ki nongtrei ka Disaster Management bad ka pyni ba kim don bynta eiei ruh em, ban iarap ia katei ka jingjia kaba shem lanot khait.

Hangne ka wan ruh ka phang, kaba iadei bad ka tnat pulit pynlip ding lem bad ka tnat pulit hi baroh kawei, namar ba ka jingpluh, ka dei tang shiteng kilometre antad eiei na ka thanad kaba heh, kaba don ha Lumdiengjri bad khlem pep, ha ka por mynstep lei, ka jingsma tdem lane ka jingthaba jong ka ding, kan jin da la pyn kyndit ia ki pulit kiba don ha katei ka jaka; hynrei hangtei ruh la iohi, ba ka don ka jing synjor kaba jur bha, namar ba ka shimpor ia ki kali pynlip ding haduh shi kynta shiteng tam ban poi sha ka jaka jong ka jingjia.
Don ka jingong ba ki kali pynlip ding, ki don tang kiba heh bad ki bym ioh lad ban rung sha ki surok kiba khim bad lada ka long kumta, ka pyni ba ka jingtrei jong ka tnat Fire Brigade, ka la pheil shaba palat than, namar ba ka jingpluh ding, kan nym lah ban jia tang ha surok bah, hynrei ka jia sha ki khlaw, ka jia sha ki riat, ka jia sha ki lynti kiba khim bad kumta ter ter.
Ka jingjia ha Qualapatty, khlem pep ka dei ka jingjia kaba sngewsih tam jong kane ka juk shai kaba mynta bad ka la dei ka kamram jong u myntri kam poh iing, u heh duh ki pulit Jylla, ba un dumok ia la ki jong ki nong bylla, namar ka ka jing kitkhlieh ka dei ia ka tnat pulit ba kan teh lakam ia kum kitei ki jingjia pynjot jong ka mariang.