Editor,
Ha kaba iadei bad ka jingthoh jong U Rgh. Albert Thyrniang kaba la ai kyrteng “Sinister Motives at work in Meghalaya”, kaba la mih ha ki kot khubor phareng ha kine ki sngi ba la dep, nga pynpaw hangne ba nga pdiang ia ka phang kaba ong ba ym don hok lane nongrim ban buh ia ki dak lane ki dur blei jong kino kino ki niam ruh ha ki jaka pule kiba la kyrshan da ka bor sorkar jylla lane sorkar pdeng ka ri India. Kumjuh ruh ha ki jaka pule ba la ioh jingiarap shiliang lane pura da ki paidbah (partially or fully funded by the public), lada kita ki dei ka bor Sorkar India lane jong ka Univeristy Grants Commission.
Nga sngew ruh ba dei ban batai shai hangne, ba ngim don jingtip ei ei halor kata ka kynhun Legal Rights Observatory ba ka dei ne em ka kynhun kaba mihkhmat na ka bynta ki ba ngeit ia ka Ñiam Tynrai kumba la kynnoh da u nongthoh. Kumjuh, kino kino ki kynhun kiba nabar kim don hok ban tuklar ia ki kam kiba iadei bad ki kam shi iing jong ka jaitbynriew Khasi khara kaba la don la ki jong ki nongrim naduh ki por kulong kumah.
Nga kyrpad ia u nongthoh jong katei ka jingthoh ba un nym ialam bakla ia ki briew da kaba saphriang ki khubor lamler namar kine ki khubor lamler, ki ktah mationg iaki ba bun ki paidbah.
Kumban shu pynkynmaw, ka tynrai jong ka niam Khristan kadei na ki thaiñ Pdeng Mihngi (Middle East) kiba naduh kulong kumah, ki la don la ki jong ki dustur, ki rukom synshar bad la ki jong ki rukom leh ñiam. Watla katta ruh ka dei ka jingshisha ba ka ñiam Khristan ka la wan sha ki thaiñ India tang kumba lehse 2000 snem mynshwa bad kala suhthied haki jaidbynriew kiba la tip kum ki Syrian Khristian. Kane ka la long la man ha ka jylla kaba ngi khot ka Kerela mynta.
Ngi dei ban pdiang ba ka ka jingpykylla ñiam ia kino kino ki khunbynriew ka pynjah noh ia ka jinglong tynrai jong ki namar ka rukom leh ñiam bad ka riti ka dustur ka dei ka thymmei longbriew manbriew jong ki, khamtam ki riewlum. Ha kaba iadei bad ka jingthoh jong U Rgh. Albert Thyrniang ba ki riewlum ha ki khap sor Assam ki la kylla long Hindu lut bad ki la duh ia la ka jinglong tynrai, ngi dei ban sngewthuh bad kynmaw ba kano kano ka jingpynkylla ñiam, khlem artatien, kan ialam sha ka jingpynkylla ruh ia ka thymmei jong ki. Kane ka long namar ba ka ñiam bad ki riti ki dustur ki long ki maw nongrim, ki mawbyrsiew, ba kynsai bad ba nylla jong kino kino ki nong riewlum (indigenous community).
Ngim lah ban len ruh ba ka Ñiam Khristan ka la pynjah bad pyndan ia ki riti ki dustur, ki khanatang ki puriskam, ki jingrwai bad ki sur kiba iadei ym tang ia ki riewlum ha salonsar ka Ri India hynrei kumjuh ruh ia ki jaidbynriew ha ki thaiñ Africa bad Latin America.
Ha kaba khatduh nga kwah ruh ban pynshai ba ki Rangbah nongialam bad ki nongbud jong Ka Seng Khasi kim don jingshun lane jingpyrshah iano iano ruh hynrei ngi ieng skhem triang ha ki nongrim kiban iada, kyntiew bad pynneh ia ka Ñiam Tynrai jong ki Khasi. Ki nongbat jong ka Ñiam Tynrai ki dei shisha longtrai-nongri, ki nongsumar bad nongiada ia ka Ñiam Khasi, kata- ka Ñiam Tip Briew Tip Blei, ka Ñiam tip hok tip sot, ka ñiam kaba hikai ban ieid ialade bad ban burom ia kiwei.
B. K. Dey Sawian
Shillong- 5
Phi don ban ong eiei?