Jrong kti u bar Jylla ia ka samla 14snem

Shillong: Ka Khasi Students’ Union War Jaintia Circle myn sngi saitjain, ka la kem ia uwei u bar jylla uba kyrteng u Md Joynal Uddin, halor ka jingjrong kti jong u ia kawei ka khynnah 14 snem ha Amlarem.

Ka seng hadien ba ka lah ioh ka jingpyntip na kiba ha iing jong kane ka khynnah khlem pynslem shuh ka la leit thwet ia une u runar bad hadien ka jingthwet la ioh kem ia une u runar hajan shnong Khonglah katba u dang thmu ban leit trei ha kawei ka iing.

Ka seng ka la tohkit ia une u runar bad hadien ba la lap ia ka jingshisha ka la ai ia ka jingsneng kaba tyngeh bad la aiti noh ia u sha ki pulit ban leh ia kaba donkam.

Ka seng ka pynrem jur halor kane ka jingnud jong une u bar jylla ban jrong kti sha ki kynthei khynnah Khasi jong ngi bad ka seng ka maham jur ruh sha baroh ki Dorbar Shnong hapoh War Jaintia ba kim dei shuh ban ai lad ia ki bar jylla ne ki mynder ri ba kin wan shong wan sah hapoh u pud u sam jong ka War Jaintia ba lada lap ba ki leh ia kino kino ki kam kiba long pyrshah ia ka imlang sahlang ka seng kan ym shong kli kti kan sa leh ia kaba donkam bad kino kino ki ba pyrshah kin hap shim hi ia ka jingkitkhlieh ha lade lada jia eiei.