Wan kit ki pulit ia ka kali 108 na phyllaw ka GVK EMRI 

Shillong: Katba ki nongtrei ka GVK EMRI 108 hapoh ka lama ka Meghalaya EMRI Workers Union (MEMRIWU) ki dang ap ia ka jingialang ba khatduh sa kawei ban pynbeit ia kane ka jingeh katkum ka jingialang bad u myntri ka tnad ka koit ka khiah myn ka11 tarik mynta u bnai, pynban kynsan kynsan mynta ka step ka 16 tarik, ki bor ka sorkar ryngkat bad ki police ryngkat bad ka management ki lah wan tur thma kyndit kyndit dang step phyrngap ha ka por ba kine ki nongtrei ki dang ioh thaih bha ha jaka ba ki dang iakhih ha phyllaw ka ophis ka EMRI ha Lawmai.

Ha ka jingpyllait kyrwoh, u president ka MEMRIWU u bah Roypar Kharraswai u la ong ba ha kane ka jingwan jongki, ki la wanlam ruh ia ki briew ban shna ia kine ki kali ba kin ioh ban rah ia ki.

  U la ong ba haba pyrshang ban kylli ia ki, mano ba ai bor ia ki ba kin leh kumne, ki ong kane ka hukum ka wan na ka sorkar. La don ruh da ka jingleh bym suidniew shuh ia ki tiar shet jong kine ki nongtrei, ha kaba ki don katto katne ki pulit ki lah kynjat bad bret shabar ia ki khaw, ki tiar, ka um bad kiwei kiwei de ki tiar. 
  Halor kane ka jingleh bym suidniew shuh, na ka liang ki nongtrei ki lah pynpaw ka jingbitar kaba khraw bad ki lah buh jingkylli ruh ia ka sorkar, balei ki wan thombor kumne namar ba kine ki nongtrei ba iakhih kim dei ki lehnoh hynrei kidei tang kiba dawa ia ka hok, pynban ka sorkar bad ka GVK kiba don ka bor.
  U bah Roipar u la ong ba ha jaka ba kin iarap ia kum kine ki nongtrei kiba rit ba rai, ki nang nion pynban ar shah ia ka hok jong ki. “Ka khubor hi na ki nongtrei sha ka sorkar bad sha ka GVK ka long ba ko sorkar bad ko GVK , to nang pyndonkam shuh shuh ia ki bor jong phi ban nion bein ia ki nongtrei kiba duk ba rangli, tangba kynmaw ba shisien ka sngi, kan poi ka por ba ki nongtrei kin sa shim ia kiwei pat ki lad ki lynti bad ka hok kan sa ieng ban bishar ia ka jingshahlehbein jong ki”, la ong u bah Roipar.