Yn pan biang ka KHADC ia ka Land Bill na ka sorkar

Shillong: Ka Executive Committee (EC) ka Khasi Hills Autonomous District Council (KHADC) ka la rai ban pan biang ia ka Land Bill kaba la dep phah sha ka sorkar jylla.

Haba pyntip ia kane myn hynnin ka sngi, u CEM ka KHADC u bah Teinwel Dkhar u la iathuh ba ka jingialang ka EC ka la rai ban phah da ka jingthoh sha ka sorkar jylla ba kan pynphai biang ia ka Land Bill kaba la dep phah ka EC barim namar ba ki don shibun ki jingduna.

“Ngi la rai ban phah jingthoh sha ka sorkar jylla ba kan pynphai biang ia ka Land Bill ka Council khnang ba wanrah da kaba thymmai namar ba ki don shibun ki jingdkoh ha ka Land Bill kaba rim”, la ong u CEM.
Ha kajuh ka por, u CEM u la iathuh ba ka Council ka la rai ban wanrah da ka Rai ban pyrshah ia ka Citizenship Amendment Bill (CAB) na thmu ka sorkar pdeng ban wanrah biang ha kane ka dorbar tlang ka Parliament.
     U bah Teinwel ula ong, “ka EC ka la rai ban wanrah da ka rai ban kyntu ia ka sorkar pdeng ban pyllait noh ia ka jylla Meghalaya khamtam ki jaka rilum na ka CAB”.
         U CEM ula iathuh ba yn wanrah ruh ia ka Waste Management Bill ka Council. 
     U bah Teinwel ula iathuh ba la iakren ruh kiwei ki mat kum ka elekshon shiteng samoi ban wanrah ha kane ka dorbar tlang kaban sdang naduh ka 19 tarik mynta u bnai.