Shillong: U bah Ivanlumlang Marbaniang u la iehnoh ia ka kam President ka People Democratic Front (PDF) bad ia kane la pdiang da ka jingialang ka party hynnin ka sngi.
Ia ka kam Acting President la bynshet ha u bah Banteidor Lyngdoh, MLA ba long ruh u myntri sorkar ban peit haduh ban jied da uba pura.
Haba pynbna ia kane mynta ka sngi ha ka jingiadonlang ki nongkitkam ka party, u bah Ivanlumlang u la ong ba ka jingiehnoh kam jongu, kam dei namar ba u shah pynbor ne shah pynhiar hynrei ka dei da ka mon sngewbha namar ba u don ki kam ba kham khia nalor ka kam iing.
“Nga la rai ban aiti da ka mon sngewbha ha u bah Banteidor. Kam don kano kano ka jingiakhun ne ka jingiaknieh na kano kano ka jinghuri hura ha ka party hynrei ka don jong nga namar ba nga don ki kam ba khia nalor ka kam iing”, la ong u bah Ivanlumlang.
U bah Ivanlumlang u dei uwei na u president uba seng ia ka PDF bad u bah Pynshngain N Syiem mynshwa ha u snem 2017 bad katkum ka kyndon, ka por ka dei ban long lai snem kaban sa kut noh shen.
U la iathuh ba ia kane ka kam, la iakren ha ka Central Executive Committee ka party hynnin ka janmiet kaba la pdiang ia kane ka rai jong u.
“Ka dei ka khana ha ka seng sain pyrthei ba u president un aiti suk khlem kano kano ka jingiakhun”, la ong u bah Ivanlumlang.
Ha kane ka jingkren sha ki lad pathai khubor, la don lang ki nongialam ka party naduh ki MLA bah Hamletson Dohling, bah Gavin Mylliem, bah Banteidor Lyngdoh, lait noh u bah Jason Mawlong bad ka kong Macdalyne Mawlong kiba jah.
Ha kajuh ka por, ka PDF ka la bynshet noh ha u bah Ivanlumlang ia ka kam kaba kham rit kata ka kam chairman kaba ju bat da u bah Pynshngain N Syiem shwa ba un mih na ka PDF.
Ha kajuh ka por, u bah Banteidor u la ong ba ka jingialang ka party hynnin ka dei kaba jrong tam haka jingiashong pyrkhat kam ka party namar naduh ka 5:30Pm la wai haduh 10baje janmiet.
U bah Banteidor u la ong ba kum ka party ka dei ka kamram jong ki nongialam bad ki nongkitkam ban iatreilang ban kyntiew ia ka party bad khamtam ia ka elekshon MLA ha u snem 2023.
Ka PDF ka jop saw ngut ki MLA hadien ba la thaw ha u snem 2017 ba kynthup ia u bah Hamlet Dohling, bah Banteidor Lyngdoh, bah Gavin Mylliem bad u bah Jason Mawlong. Ka don ruh 2 ngut ki myntri u bah Banteidor bad u bah Hamletson ha kane ka sorkar Meghalaya Democratic Alliance (MDA).
Phi don ban ong eiei?