“Dei ban kha pat ia phi!”

AIS Suja

Dei ban khapat (Born again) ong u Jisu. Dei ba kha sa shisien pat ia u briew. Namar ia kaba la kha na ka jong ka doh, ka long ka doh; bad ia kaba la kha na u Mynsiem, ka long Mynsiem” Ioanis 3:6.

La kha ia uwei pa uwei u briew sha kane ka pyrthei da ki kmie ki kpa. Ka mut la kha ka ka longdoh longsnam. Kumta katkum ka ktien u Blei, lada kha ia u briew tang shisien, un iap arsien.

Kata ka mut u briew un iap ha ka doh bad ha ka mynsiem, ka mynsiem (Spirit) kam lah ban leit sha bneng sha ka Hima u Blei. Na kata donkam ban kha pat ia u briew, lymda khapat (Born again) ia u briew, um lah ban iohi ia ka Hiam u Blei” Ioanis 3:5.
U Jisu u ong ha u Nikodimos – “Wat sngew kyndit te ba nga la ong ia me, ba ka dei ban kha pat ia phi” Ioanis 3:7. Dei na kata ka daw, ia uba la kha tang shisien tang ha ka doh, u kut ha ka doh hi bad um tip ia kiei kiei kiba kynja mynsiem (Spritual), bad um lah ruh ban bsut hapoh ka hima u Blei. Ioanis 3:5 / 1 Korinth 2:14. Ym dei ban sngewphylla ne sngew kyndit ia kane namar ka dei ia u briew ban kha pat ia u lym kumta um lah ban poi bneng, ka ktien u Blei ka kren shai kdar.
U Jisu u ong – “Ym u briew uba ong ha Nga Ah Trai Ah Trai, u ban ioh leit bsut hapoh ka hima ki Bneng” Mathaios 7:21. Ym tang ba ngi la long Khristan te ngin ioh beit ban bsut sha ka hima u Blei, hynrei, tang uta kein uba leh ia ka Mon u Kpa jong nga uba ha Bneng” Mathaios 7:21. Ka jingkha pat ka long kawei na ka Mon u Blei khnang ba u briew un ioh jingim bymjukut, kata, ban kha pat na ka um bad na u Mynsiem. Namar ia kaba la kha na ka jong u Mynsiem, ka long mynsiem” Ioanis 3:5-6.
Na ka um – “Ia uba ngeit bad ioh pynbaptis yn pynim” Markos 16:16. Na u Mynsiem – Haba ki la ia leit ha u (Ioanis), la pynbaptis ia ki ha wha Jordan – ki da ia phla noh ia ki pop jong ki” Markos 1:5. Ki da ia phla pop (repent) bad shah pynbaptis, ong ka ktien u Blei.
Kumno u Petros u ong? “To phin kylla bamut (repent) ba yn pynbaptis ia phi uwei pa uwei IA KA BAN IOH MAP KI POP: BAD phin ioh diang ia ki jingai (Gift) jong u Mynsiem Bakhuid (Gift of the Holy Spirit). Ki kam ki Apostol 2:38.
Kane kein dei kata kaba la kha na u Mynsiem Bakhuid, bad u ioh diang ki jingai sngewbha na u Mynsiem Bakhuid jongu Blei. Kane ka dei ka jinghikai u Jisu ka jinghikai u Mynsiem Bakhuid jong u Blei.
Ka jingai sngewbha (Gift) na u Blei dei hadien ba la kha pat (Born again), kata u briew u la long u jingthaw Bathymmai (a new creation), ym shuh u briew uba rim (old man) ne uba kynja doh hynrei uba thymmai kein uba kynja mynsiem. Namar ia kaba la kha na ka jong u Mynsiem, ka long Mynsiem. Ioanis 3:6.
U Jisu um kren tang ha u Nikodimos, hynrei u dang kren mynta ha kane ka pateng bynriew lyngba ka ktien jong u, ba ka dei ban kha pat ia u briew.
Kumta ka jingkha pat ka iaid lang ryngkat ka jingphla (repent) bad ka jingpynbaptis ha ka um, kane ka dei ka jingkylla bamut bashisha, namar u briew u donkam ban pynkhuid ialade namar u Blei u long uba khuid, namar ka bym khuid kam ioh bynta ha ka Hima ki Bneng. “Bad uba iaileh ia ka pop, u iai leh ia ka jingpalat hukum: Te ka pop ka long ka jingpalat hukum” 1 Ioanis 3:4.
Dei halor kane ka nongrim ba u Jisu u la ong ha u Nikodimos – “Shisha shisha, nga ong ha me, lymda kha pat ia u briew, um lah ban iohi ia ka Hima u Blei” Ioanis 3:3.
Mynta ka por kam don shibun ba u Blei un dang iai ap shi iai ap ia u briew ba un kylla bamut, namar ka sngi u Trai kan wan kum u nongtuh, bad u Blei um kwah iano iano ban jot noh, hynrei ba baroh kin poi sha ka jingkylla bamut (da ka jingkhapat)” 2 Petros 3:9-10.
Amen.