Shillong: Ka Meghalaya Youth Congress ka la kam ba ka jingpyntreikam ia ka skhim sam ding ei ia ki briew ba duk, ka la iaid suki bha ha Garo Hills watla ka jingbuh thong ban pyndep ka long ha 31 tarik Nohprah 2018.
Haba pynlait khubor, u president ka Meghalaya Youth Congress u Richard Mrong Marak u la ong ba kane ka skhim sam ding ne ka Saubhagya ka sorkar pdeng kaba buh thong ban ai ding lut baroh ki longiing jong ki shnong ka dang iaid tang kumba 30-40 percent ka jingtrei ha Garo Hills.
Halor kane, ka Meghalaya Youth Congress kan pynlong ia ka jingiakhih da kaba shong kyrain habar ka ophis ka MeECL ha Tura ha ka 11 tarik Naiwieng 2019 por 11:30 AM, la ong u Marak.
“Ha baroh kawei ka Garo Hills kaba don kumba 1000 tylli tam ki shnong, ka skhim ka suki bha wat la buh ban pyndep lut baroh ha ka 31 tarik Nohprah 2018. Wat tang 30-40% ruh ka jingtrei kam pat iaid”, la ong u Marak.
U la kynnoh ruh ba ka jingbuh kyndon ia kiba thep tender ban jied ia ki kontraktor ka long kaba kyllain bha ha kaba ka kompeni M/s Onycon, kaba la ioh ban pyntrei ka la leh suki bha bad kane ka la wanrah ka jingsuba jur ba ka rukom treikam ka MeECL bad ki paidbah ka Garo Hills ki donkam ia ka jubab halor kane ka jingpyndonkam bakla ia ka pisa u paidbah.
Phi don ban ong eiei?