Shillong: Ka Khasi Student’s Union (KSU) ha kane ka sngi Palei kaba mynta ki la pynkynmaw biang ia ka Citizenship Amendment Bill (CAB) bad ki la mynjur ba kin nym pdiang ia kane ka bill.
“Naduh ba ka KPC ka la wan ha kane ka state, ngi la dep pynshai ba ngin nym pdiang ia ka CAB.Ka jingieng bad ka jingiakren ka long kaba shai bha ba ngin nym pdiang ia kata,”ong u President ka KSU u Lambok Marngar.
Hangne ruh ngi lah ban ong ba u Home Minister u Amit Shah myn ha kane u la dep pynshai ba kin sa sdang noh ia ka jingkren bad ki briew kiba dei peit ia kane ka Citizenship Amendment Bill (CAB).
Wat la katta, ka KSU kam sngewtynnad ia ka jingleh jong ka union ministry ha ka ban pynlong ia ka jingkren ha shwa ba kin wanrah ia ka bill hapoh ka dorbar thaw ain.
“Wat lada ki pynlong ia ka jingiakren ka jingieng ialeh bad ka jingiakren ka long kaba shai,”Ong u Marngar katba ki dang kylli ia ka thong jong ka sorkar halor ka jingwanrah biang ia ka bill “Haba ka sur jong u paidbah ka thain shatei lam mihngi ki la pynshai bha.”
“Balei ka sorkar pdeng ka dang pynbor ban wanrah ia kane ka Citizen Amendment Bill haba ki paidbah ka thain shatei lam mihngi ki la pyrshah thikna. Haba la dep kren shai ba na ka liang jong ki paidbah ka thain shatei lam mihngi kim sngewtynnad ia kane.”ong u president ka KSU.
Ha kane ka meeting kaba dang shu dep long, la ong ba ka NESO ka la kular ba kan sdang ia kane ka jingiakhih halor ka jingpyrshah ia kane ka CAB naduh ka 18 tarik mynta u bnai,”ong u Marngar, “Ha ka jingiakynduh lang jong ka NESO kaba dang shu dep pynlong ha une u bnai uba la dep kan dang don ka jingbteng halor ka jingpyrshah, kan don ruh ka jingiakhih ka ban sdang naduh ka 18 tarik u Naiwieng ha ki thain shatei lam mihngi kum ka dak ban pyrshah bad ba kin nym pdiang ia kane da kumno kumno ruh.”
La ong ba ka jingthmu jong ka Sorkar India ban wanrah biang ia kane ka Bill ha ka Lok Sabha, u president ka KSU u la ong, “Lada ka sorkar pdeng da ka bor ka pass ia kane ka bill ha ka Lok Sabha bad ka Rajya Sabha, kane ka pyni shai ba kim khein ia ki paidbah ka thain shatei lam mihngi kum ki nongshong shnong ka India.”
“Kum ka Sengbhalang, la jop ne rem, kam ju lei lei hynrei ngin iai bteng ban ieng ialeh pyrshah ia kane ka bill da kumno kumno ruh,”u la ong.
U Myntri Rangbah ka Jylla u Conrad Sangma u la dep pyntip ia u Union Home Minster ia ka jingdonkam ban iakren bha bad kumjuh ban ia shim bynta ban pan jingmut na ki briew kiba dei peit ia kane ka CAB.
Kat kum ka jingong jong u Sangma, u ong ba u Home Minister u la pyni bad u la kwah ban iakynduh ia kine kiba dei peit ia kane ka CAB ban iakren bad lum lang ia ki jingai jingmut halor kane ka phang bad u la dep phah ia ka sorkar jylla ba kan sdang ban leh eiei khnang ban wan rah biang ia ka jingsuk.
“Nga tharai ka Sorkar Jylla, kan don ia kajuh ka jingmut bad lada ka sorkar BJP kan pass ia kane ka bill da ka bor hapoh ka Rajya Sabha bad hapoh Lok Sabha, kan ym dei tang ka jingialam jong ka central ka ban shim khia hynrei ki nongialam ka BJP jong ka jylla ruh ki hap ban shim khia.Ngin ia peit kaei ka ban jia ha kine ki sngi ki ban wan,” u la ong.
Phi don ban ong eiei?