Kwah ka Hasina, ban nang pynkhlain khaii ka Jylla bad ka Bangladesh

Ka Sheikh Hasina, myntri rangbahduh ka Bangladesh, ka kwah ia ka Meghalaya, ba kan pynkhlain ia ka khaii pateng ha katei ka Ri bad katei ka dei ha ka jingiakren hapdeng ka Hasina bad U Conrad Sangma, myntri rangbah ka Meghalaya, haba u leit ia kynduh ia ka hynnin ka sngi, ha ka iing sah jongka.

“Ki nongkhaii na Meghalaya, ki lah ban khaii ha Bangladesh, khamtam ha Sylhet, ha kaba ka don ka kad khaii jong ka Sunamganj,” ong U Ihsanul Karim, uba dei U Press Secretary jong ka myntri rangbahduh, haba kren sha ki kotkhubor, hadien ka jingialang, kaba la pynlong ha Ganabhaban, hynnin ka janmiet.

Ka Sheikh Hasina, ka ong ba ka kad khaii ha Sunamganj, ka dei ka jaka kaba haduh 2,000 acre bad kaba lah ban pynlong ka kad khaii kaba heh bha.

Ka Hasina, ka ai jingmut ruh ia ka India, ba kan pyndonkam ia ka jing khaii maw lyngba ka jhad, namar ba kam da long kaba rem dor than bad ka ai jingmut ban pynlong ia ki wah, kiba bit ba kin iaid ki lieng kiba heh.

Ka Hasina, ka iathuh ruh ba ki lain rel, kiba la khang hadien ka snem India Pakistan, ha u snem 1965, la plie biang mynta.

U Conrad Sangma, myntri rangbah ka Meghalaya, u pynsngew ba ki don shibun ki mar, kum u mawshun, ki maw shna dewbilat, u dewiong bad ki maw ruh kiba lah ban shalan sha Bangladesh. U Sangma, u pynsngew ruh, halor ka jing khaii ha ka lain rep, ka lain bording bad ka kolshor ruh. U la pynsngew ruh ba ka sorkar Jylla ka kwah bha ban pyndonkam ia ka kad um Chattogram, na bynta ki mar ki mata na ka jylla sha Bangladesh.