La dep artad ka lynti rel ha Meghalaya, sa ban plie paidbah

Shillong, 2 Naitung:
Ka jingtrei ia ka lynti na Dudhnoi-Mendipathar la dep bad kaba sah mynta ka long sa ban plie ia ka.
Ka thymmei khubor na ka tnad Northeast Frontier Railway ha kane ka sngi Balang ka la iathuh ba ka jingtrei la dep nadong shadong bad kaba sah ka long sa tang ban leh ia ka Commission of Railway Safety (CRS) ne ban tes shwa ban iaid ki rel.
Ka thymmei khubor ka la iathuh ba ka tes CRS yn leh ha ka 16 tarik Naitung.
Kane ka projek ka la slem na ka por ba la buh namar ka jingdkhot ha ka rukom shim jaka ban shna ia kane ka jingthmu ha ki katto katne ki bynta.
Da ka jingwan ka lynti rel, ki paidbah ka Garo Hills ki lah ban pynkit ia ki mar jongki ha ka dor kaba kham tad ban ia ki kali.
Ka sorkar pdeng dang shen ka la pdiang ia jingmang pisa shuh sa T.400 klur ban pyndep ia ki lai tylli ki lynti rel ha kane ka thain shatei lammihngi ka India kynthup kane ka Dudhnoi-Mendipathar.
Ka jingmang pisa ia kane ka lynti rel ha Meghalaya ka long T.86.22 klur hynrei la mang shuh shuh hadien sa T.144 klur.
Lah ban kdew ba kumba 65.09 hectare ki jaka la aiti sha ka tnad NFR na ka bynta kane ka projek ha u Nailur 2011.
Ki jaka ban iaid kane ka rel ki long ka Nolbari-Deuripara, Boromiapara, Chotomiapara , Mataranga, Manikganj, Horingkata, Bakenang-Tilapara bad ha Mendipathar ka North Garo Hills district.
Ka la don ka jingthmu ban pynpoi lynti rel sha kane ka rilum Khasi ruh haduh sor Shillong thymmai.